MATEMATIKA PINANG

Satu kali begini, bapa guru tanya Yaklep

Guru: "Yaklep, 5-3 = berapa?".

Yaklep: "sa tra tau bapa"

Guru: "Umpama ko pu pinang 5 karung, trus Enos ambil 3 karung, trus ko pu pinang tinggal berapa karung?"

Yaklep de pikir lama sampe...tralama de ketawa sambil buang ludah : "Hahaha, Enos brani ambil sa pu pinang, sa plungku dia to"

HAFAL PANCASILA

Satu kali ni gara-gara ribut di kelas, Yonas anak kelas 1 SMA ni dapa kasi hukum dari pa guru.

Obet dapa suru hafal Pancasila besok di depan kelas. Tapi karna Obet tra tau belajar jadi de tra ambil pusing.

Baru malam ni pace tindis vodka deng anggur deng dia pu kaka yang kuliah di universitas, de kaka kasitau hafalan pancasila yang baik dan benar. dong mabuk picah trabae.

Besokannya paguru suru de ke depan baru hafal pancasila..

Obet tindis begini..

Pancasila..
1. Tuhan tong pu bos suda..trada yang tangkis..
2. Jadi orang jang tratau adat..tong semua harus adil kah tete bilang..
3. Tong semua satu..trada yang pele..
4. Semua rakyat kumpul bae-bae baru baku tukar otak kasi pecah masalah..
5. Buat rakyat-rakyat semua ..kam liat, sa ini sudah.. yang adil dan sosial

Pa guru deng murid-murid su taguling picah tertawa di blakang.

TULIS HURUF SIUL

Anak satu ni de dapa mara dari de pu ibu guru di skolah. Ibu guru suruh dia untuk tulis kalimat "BUDI PERGI KE PASAR" baru de tra bisa tulis jadi ibu guru bilang dia : “Bodok!!”

Anak ini de tra terima jadi de pulang lapor de pu bapa.

Anak : “Bapa, bah, masa ibu guru de bilang sa bodok”.

De pu bapa marah trus de pu bapa bilang: “ah, iyo ka? Anak, besok bapa ke skola cari ibu guru dia”.

Besok begini bapa de tiba di skola baru bapa ko cari ibu guru. Pas bapa ko ketemu ibu guru, bapa langsung tanya: Ibu, ibu yang kemarin yang bilang sa pu anak bodok ka?”.

Ibu guru ko gugup langsung.

Bapa de bilang : ”Ibu, kalo ko memang pintar, coba ko tulis ini.... (bapa de bersiul)”

DENDAM BERHITUNG MATEMATIKA

Suatu hari di sekolah, Obed dapat tanya dari Pak Guru Matematika.

Guru: “Obed, bayangkan ko punya 10 permen, trus ko bagi ke ko pu teman Nico 3 dan ke Acong 5, berarti ko punya permen tinggal berapa?”

Obed: “Itu gampang pak guru, sa pu permen tetap 10 pak…”

Pak Guru: “Kenapa begitu? Ko hitung bagemana kah?”

Obed: “Soalnya, Nico dan Acong dong dua pernah sembunyi sa pu kaos kaki jadi jang harap sa mo bagi apa-apa ke dong dua… sorry ee…”

YAKLEP DAPA SEPULUH

Ada satu siswa kelas 1 SD nama Yaklep. De setiap ulangan atau tugas selalu dapat nilai diantara 7 8 dan 9.

Satu waktu de dapat nilai 10 jd de senang sekali.

Trus de lari dari sekolah ke de pu rumah yang agak jauh dari sekola..

Sampe rumah de hosa-hosa karna cape.  Jadi de pu mama tanya.

Mama : "Yaklep kenapa?"

Langsung de jawab : "Mamaaaa... sa dapat nilai sepuluh."

Mama :"Mana, mama tra percaya?"

Sambil kasi tunjuk kertas, Yaklep bilang : "Ada ni....?" ,

Mama lihat begini, ternyata bukan 10 tapi 0 besar yang ada tagaris di samping.

Langsung mama bilang : "Ah.. 10 apa? Ini 0 bru."

Langsung Yaklep de bilang : "Ohhhh..tadi sa lari cepat-cepat jadi, mungkin satu de jatuh di jalan kapa???"