Showing posts with label DAPA TIPU. Show all posts
Showing posts with label DAPA TIPU. Show all posts

PENYEBAB UJUNG KARANG KAYU PULO TERBELAH DUA


Jadi pace Tinus yang adalah seorang nelayan ini ada tanya deng Yohan de pu teman, "Ko pu perahu kenapa terbelah jadi 2 seperti itu?"

Yohan jawab, "Ko lihat ada batu karang di ujung Kayo Pulau yang tong pernah lewat waktu itu to?"

Tinus berkata, "Yo sa ada lihat dia tabelah dua. Kenapa jadi?"

Yohan jawab lagi deng muka lesu, "Itu yang bikin sa pu perahu terbelah dua, karna waktu lewat di itu sa tra lihat.."

SELAMAT DARI INTIPAN KOLOR


Satu kali Mince dengan dia punya mama ada mo jalan - jalan ke Jayapura Mall. Dong dua naik taksi dari Bank Papua.

Pas di dalam taksi begini ada mahasiswa dua duduk depan Mince baru bikin gerakan-gerakan aneh.

Dong dua sengaja kasih jatuh-jatuh bolpen, pensil, hape, buku di depan-depan mince sambil liat-liat Mince. Tapi minde de cuek-cuek saja.

Turun di mall begini Mince pu mama bilang : "Ince... ko tadi tra sadar kah, kalo mahasiswa dua depan ko itu pu gaya aneh-aneh...."

Mince dia jawab : "Oooo... yang tadi di atas taksi itu!

Mama : "Ko mengerti dong dua pu tujuan kasih jatuh-jatuh bolpen deng hape itu apa?"

Mince dia jawab : "Ah... dong itu cuma mo liat-liat sa pu kolor saja ,,,... tapi mama sante... karena sa pu tujuan untuk begitu supaya dorang tra liat mama pu kolor, sebab mama juga duduk  lebih tabuka.."

Mama : "Oh bagus itu anak, aduh mama malu sekali kalo dong liat mama pu kolor.... Tapi masalahnya tadi ko pake kolor yang mana,??"

Mince dia jawab sante : "Yee.. sa tra pake kolor to... supaya dorang tra bisa liat sa pu kolor...."

CARA BAGI IKAN YANG ADIL


Yakob deng Enos pi mancing ikan. Pas pulang begini dong dapat cakalang 3 ekor. Jadi sampe pante dong dua mo bagi ikan.

Yakob: "Bah neh ko dapat ikan satu, sa satu. Tapi masih ada lebih satu ini bagemana?”.

Sudah dong duduk baku melawan.

Dong dua baribut sampe akhirnya Yaklep datang tanya dong dua: “Kam dua baribut apa?”

Sudah dong dua cerita ikan yg lebih satu.

Yaklep: “Oh, kalo begitu gampang, Yakob ko dapat 1, Enos ko juga dapat 1, trus..."

Yaklep: "Sa dapat satu. Pas to?”.

Yakob deng Enos jawab: "bah, Coba pace ko datang dari tadi ka, jadi tong tra baribut to”

BABI PIKIRAN


Pace satu nih de mo brangkat dinas luar kota untuk satu minggu, jadi de kasih de pu anak nama Jhon uang satu juta untuk de pu uang makan deng kasih makan babi.

Bapa : "Jhon, bapa mo dinas luar kota jadi....ini uang satu juta untuk ko pu uang makan deng kasih makan ktong pu babi...."

Jhon : "Yo bapa, aman itu...."

Begini pace ko brangkat, Jhon cuma kasih makan babi, nasi kosong campur deng krupuk saja slama satu minggu.

Pas satu minggu begini pace ko balik, nech de heran liat de pu babi pu badan jatuh.

De panggl Jhon bru de bicara

Bapa : "JHON KO BICARA....!!!, SEBETULNYA KO KASIH MAKAN BABI KA TIDAK...?????"

Jhon ko tangkis : "BAPA SA KASIH MAKAN BABI....TAPI SU TAU TOH....BAPA PU BRANGKAT DINAS ITU YANG BIKIN BABI DE PIKIRAN SAMPE DE BADAN JATUH......."
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.