Showing posts with label JAWA. Show all posts
Showing posts with label JAWA. Show all posts

KAMAR DI SAMPING WC DISEWA


Pace ni karna su asik di Jawa trus ketemu dengan perem-perem cantik.

Jadi pace su lupa dengan istri, pace tra telepon-telepon deng kirim uang lagi. Karna begitu, mace de jual diri untuk penuhi kebutuhan hidup.

Begini su satu stengah tahun baru tiba-tiba pace de telepon mace.

Pace : "Mama... adooo.. papa minta maaf, su tra telepon hampir satu tahun ni...."

Mace : "Ahhh.... tarapapa, masalahnya sudah satu stengah tahun ini baru pace ko telepon... ko bikin apa saja??"

Pace : "Adoo, itu lagi.. papa sibuk skali urus tugas yang menumpuk ni, baru mama deng anak-anak kabar baik???"

Mace : "Sa deng anak-anak sehat saja... tapi untuk bapa ko tau saja, kalo kamar yang disamping WC tu, sa su sewa untuk biaya hidup deng sekolah anak-anak..."

Pace de tra mengerti mace pu maksud, baru pace de sante-sante jawab : "Tarapapa sudah mama.... nanti papa pulang baru papa rehab kamar tu untuk bapade de pake"

ANAK JAWA BAHASA BIAK


Pada suatu hari anak-anak kecil di salah satu kampung di Jawa dong ada duduk nonton televisi.

Begini berita tentang Papua rame. Jadi ada anak jawa satu ni de bilang kalo de itu orang Papua sebab dulu de pu bapa pernah tugas di Biak. Jadi de pung teman-teman dong tanya dia.

Teman :  "Kalo kamu anak papua berarti kamu harus bisa bahasa Papua,....kalau 'Bapa' bahasa Papuanya apa ?"

Anak : "Bapa itu dipanggil 'Mansar'"

Teman : "Terus kalau 'Ibu' bahasa Papuanya apa ...ayo..?"

Anak : " Klu Ibu itu di panggil " Insar ".....!!!

Teman : "Yo..uwes...sekarang kalau 'mereka sekeluarga berkumpul' di sebut apa ?"

Anak : "...T I M S A R... "

NAMEK PESAN NASI DOANG


Ada satu namek su lapar berat baru waktu sudah larut malam.

Jadi dia pigi ke warung mba Jawa.

Terus dia bilang : "Mba ko kasi saya nasi sama lauk yang ada.."

Tapi mba bilang : "Maaf, cuma ada NASI DOANG saja"

Karna namek dia sulapar berat jadi dia bilang : "Tidak apapa"

Pas nasi su datang, namek tra langsung makan, lima menit kemudian begini mba masih belum datang, dia pikir : "Bah... nasi pu 'DOANG' belum ada ni"

Trus dia panggil mba, baru tanya : "Mba... MANA DOANGnya masa cuma nasi kosong saja???"

Terus mba bilang : "Begini mas... kalo nasi doang itu sama dengan nasi kosong, nasi tanpa lauk pauk"

Namek dia marah, langsung dia pulang sondor makan.

MAKANAN MINGGU LALU


Nie ada Pace Wamena satu, de naik pesawat baru de duduk di samping Mas Jawa.

Mas de makan roti pake mentega, baru de tawarkan ke Pace ini.

Tapi pace ni de tolak deng sopan, baru de bilang : "Ah.. tadi pagi sa yuga sudah makan Roti dgn Keju, mas"

Tra lama bgni pesawat de oleng, bru pace ni de muntah-muntah

Pace satu ini dia muntah muntah Hipere lapis dengan dia pu daun Hipere.

Bru mas de bilang : "Loh, katanya makan Roti pake Keju?"

Pace balas : "Ah.. ini sa pu muntahan makanan minggu lalu, mas"
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.