Anak Pahit Nama Pilatus


Anak Pahit Nama Pilatus

 Bapa : Atus..ko tolong beli bapa pu minuman dingin dulu di kios!

Atus : Coca Cola, ka sprite bapa?

Bapa : Coca cola saja

Atus : yang kaleng ka, yang botol?

Bapa : yang Botol

Atus : botol besar ka kecil, bapa?

Bapa : (mulai emosi) Atus buta huruf eeeee.. beli saya air putih saja sudah

Atus : Aqua ka vit bapa?

Bapa : Aqua saja

Atus : Yang dingin ka yang biasa?

Bapa : (emosi) Parang dimana eh, Sa mo bunuh anak ini!

Atus : Parang Sowek ka Parang Patimura bapa?

Bapa : Kelakuan macam binatang saja ko Atus.

Atus : Anjing ka Babi, Bapa?

Bapa : Bab Ko!

Atus : Betina ka jantan, bapa?

Bapa : LEBIH BAIK KO PERGI SUDAH, !!

Atus : Jauh k dekat Bapa?

Bapa : JAUH LEBIH BAIK

Atus : Sekarang ka besok Bapa?

Bapa : SEKARANGGGGGG

Atus : Bapa mau ikut ka tidak

Bapa : PILATUSSSSS SA BUNUH KO HARI INI JUGA

Atus : Tikam ka Tembak Bapa?

Bapa : SA TEMBAK KO

Atus : Di kepala k di perut Bapa?

Bapa :(panggil dia Maitua) MACEEEEEEEE WAKTU KO HAMIL PILATUS INI KO NGIDAM SAMILOTO K APA SAMPE DIA #PAHIT BEGINI

Mama : CUKARDELEN KO PILATUSSSSS

NENE INGAT PU PINTAR DI SKOLAH


NENE INGAT PU PINTAR DI SKOLAHPas begini sore lagit bagus, trada hujan. Jadi tete dan nene jalan-jalan.

Dong dua jalan ke arah-arah kota, baru lewat di depan nene pu sekolah.

Pas lewat depan sekolah, nene dia stop baru tacigi. Trus nene bilang

Nene: "Tete ko tau ka waktu dulu za sekolah di sini tu pu pintar apa"

Trus dia tete jawab

Tete: "Iyo...nene ko memang pintar. Ko pu pintar itu yang tadi pagi ko putar kopi tra pake gula itu ka...hhhh"

HUBUNGAN PACE DENGAN SUANGGI



Ada Pace Barat de baru pertama kali datang ke Papua.

Tapi karna de belum terlalu tau dengan orang papua pu istilah jadi de sante-sante saja.

Satu malam begini de dengar orang batariak : "suanggiiii.... suanggiii..."

Malam itu ada suanggi datang ke dong pu komplex.

Jadi orang-orang dong kejar suanggi, sambil tunjuk-tunjuk e langit

Pace barat ini de keluar dari de pu rumah trus de tanya orang-orang yang ada lewat.

Pace barat bicara dengan bahasa indonesia pata-pata : " Emmm... pachey... tadi kamu dorang tadi itu, ada kejar-kejhaar apa khaaay???"

Baru pace satu jawab : " Eh mister,  tadi tu tong ada kejar suanggi"

Pace barat ni balas : "Ooouwwww... suwanggi kah, okey okey, nanti kalaoo kamorang tangkap itu suanggu, teruszz kamorang kasih ke sayaa ey.. Suapaya saya  piara," (Pace barat pikir suanggi tu burung kapa!)

SIAPA YANG TANDA TANGAN TEKS PROKLAMASI


Yavet bapa ke ke skolah baru pace marah karna de pu anak yavet dapat pukul dar ibu guru.

Langsug ibu guru jelaskan : "sa tadi pukul yavet karna z tanya dia tentang siapa yang tanda tangan teks proklamasi kemerdekaan indonesia, tapi de tra taw jadi" 

Langsug yavet pu bapa minta maaf baru pulang menuju ke rumah.

Pace panggil yavet, baru suruh dia berdri. 

Pace langsung brlutut depan yavet baru de bilang : "yavet bapa tra mara ko, tapi kalo memang ko yang tanda tangan teks proklamasi ituu,, ko mengaku sudah, dari pada masalah di sekolah ni tambah panjang".

LOVE YOU BIMOLI


Satu Kali Acara Party jadi,
Bho Acara Gemuk :-)
Pas Pace Satu Tangkap Pucuk satu, sambil Goyang Dong Dua Kenalan,
Pace : Ade Nama zhapa ??
Mace : zs Nama MARIA PICA kk,
Pace : Oh Ia Ade, ( sambil Heran )
Mace : Bru kk Poe Nama ??
Pace : ( SenyuM sambil Pikir Nma
Pace Jwb : kk Nama JONTA, Alias JHON TABELA (sambil senyum )
Mace : sssttt ( sambil Heran )
Sdh seles Kenalan, Acara Mulai Gemuk sangat, Dong Dua shu Baku Rapat Asik, jdi Bilang Pace Dia,.
Mace : LOVE UU ??
Pace : LOVE UU Thu Apa ??
Mace : Artinya Aku Cinta kamu,
Pace : ohh Ghytu :-) ( sambil pace Pikir" pace pu Kata apa yG dhe mo Bilang Mace :-)
Pace : BIMOLi ??
Mace : BIMOLi Thu apa ?? ( Bukan Nya BIMOLI Thu Nama MINYAK GORENG ??
Pace : Ia, Thu Artinya AKU LICIN PADAMU :-) :-)

MEMORI MEMORI MELODI


Ada tiga pace dorang ada kerja bangunan 

Tiga pace ini bagi kerja, 2 di bagian pelester, 1 ni di bgian angkat-angkat campuran.

Pas dorang putar lagunya Iis Sugiarti judul Melodi Memori, pace yang angkat campuran ini ada sibuk dengar lagu, 

Pace tra lihat campuran baru menyanyi. 

Trus air semen keluar dari tengah campuran dan banjir keluar...

Baru pas di reef yang bunyinya "melodi...melodi.. meeeemori"

Tapi karena pace dia kaget dengan campuran air banjir keluar jadi  dia bilang :"ya Tuhan, ya Tuhan, yaaaaa Tuhankuuu"

TRIPLEX



CUCU tanya tete.
CUCU: apa bhs inggris angka satu..
TETE: one..
CUCU:Kalau dua ?
TETE: two..
CUCU: Kalo tiga,.?
TETE:Three
CUCU:kalo tiga stengah..
TETE: Kalau tiga tu triplekz..

PACE MENINGGAL KUNJUNGI MACE


Satu kali Pace Olof meninggal, jadi dIa pu arwah pergi ke dia pu rumah, mo ganggu dia pu Mace Enge;

Pace Olof toki pintu : tok tok tok...

Mace Enge : siapa kaaa?

Pace Olof : saya... ko pu suami

Mace : jiii.. ko sudah mati baruuuu...

Pace : tapi sa mo bicara dulu...

Mace : aisss... sa takut...ko su mati moo...

Pace : bah,... ini  penting skali....

Mace : tapi ko  su mati, jadi jang ganggu sa lagi.

Pace: adohh.. ini tentang barang satu...

Mace : tentang warisan ka togel..?

Pace : dua itu termasuk...

Mace semangat dengar pace pu jawaban jadi, mace buka pintu langsung...

Pas pintu tabuka, pace ada senyum baru bilang : ASLIII... Mace ko su jadi janda ehhh!!!

Mace de emosi langsung balas : setan otak mati...

PACE PU PIKIRAN WAKTU MESIN PESAWAT RUSAK


Pace Yaklep dan pace Kon dong dua dalam pesawat, pas su terbang, pilot sampaikan 1 dari 4 pu mesin pesawat rusak diharap penumpang tenang.

Tra lama kemudian, pilot umumkan ke-2 kali, mesin ke-2 rusak tetap tenang.

Baru setengah jam kemudian pilot umumkan. Kali ini mesin ke-3 rusak. Pilot pu permintaan penumpang tetap tenang karena hanya terlambat 1 jam.

Pace Yaklep su keringat dan slalu berdoa didalam pesawat.

Karena su jengkel Pace Yaklep dia batariak : “Pesawat sialan. Klo mesin keempat mati, berarti torang bisa satu malam tinggal diatas sini.”

pace kira di kapal kapa..

BAYGON DIMATA MOTE DAN YARANGGA


ada pace dua rencana mo mancing ikan di laut,,,,

yg satu orang biak yg satu orang paniai,,,,

jdi donk 2 dayung ke tengah laut, trus cari tempat yang pas untuk mancing

begitu tiba langsung pace biak buang jangkar

sementara los tali begini

pace biak ni lihat kaleng Baygon yang hanyut jdi dia pegang bru baca tulisan "baygon jaminan mutu", tapi karna rabun jdi dia salah baca begini : “baigon jaminan mote”,

Baru pace paniai yang ternyata marga mote ini tidak terima jadi pace ambil kaleng dari pace biak itu baru baca tulisan bagian bawanya :"baygon pembasmi yaranga…".

Pace biak yang pas kebetulan dia marga yarangga itu langsung ketawa baru bilang : "ih.... asli ehh.. torang dua pu marga ternyata terkenal eh.."

pace pania balas : "oh iyoeee..."

dong dua ketawa sendiri,,,,

MASALAH MARGA BIAK DAN BATAK


Ada pace batak satu de tanya sama pace biak.. Pak kanapa orng biak marganya rumbiak, rumbewas, rumbekwan, rumkorem..

Trus pace biak de bilang sama pace batak : “kenapa Jadi ??”

Trus pace batak jawab : “Berarti orng Biak masih keluarga dgn Rumahkos….hahaha..”

Langsung pace biak de Marah trus de bilang : "baru kenapa orang batak marganya sitorus, sinaga, sitompul.., Berarti masih keluarga dengan Sikomo yang muka macam soa-soa..!!!”

HARGA PARFUM MAHAL DAN MURAH


Satu kali Nene naik taxi (angkot). Tralama Mace 1 de naik deng bobou harum.

Nene: “ko bobou harum sampee”

Mace1: “tenang saja nene, ini BULGARI, de pu harga 2juta”. Mace de pamer, nene ko diam saja tp dlm hati ‘qmai ko sombong sampe’

Tralama Mace 2 naik.

Nene: “Bah Harum ee”.

Mace2: “Ko tau nene ini GUCCI, de pu harga 3,5 juta”. Nene dlm hati ‘epenka’

Sudah, nene ko turun dari taxi sambil konto, de pu bau busuk sampe….mace dorang 2 su mau pingsan ka ini.

Trus nene de angkat:.

Nene: “TERASI, 6 ribu rupiah!!!”

ADE PU RASA MACAM IKAN KUAH


Yakob deng Mince dong dua lagi pacaran

Yakob ini sayang2 tince, trus mo cium.

Tapi karna terlalu asyik jdi yakop ko lidah tra mendarat di bibir tapi dia langsung jilat Mince pu mata.

Mince kaget stengah mati baru de bilang : “ihh, Kk ko bikin sa macam bagimana nih??”

Trus Yakob de Jawab: ” adohh tince sory e abis ko pu rasa nih macam ikan kuah jadi”

SURAT UNTUK DIK MERIAM BELINA


Waktu pace Yakob de dengar Artis Indonesia Meriam Belina menyanyi di siaran musik senja di Radio  pace pu Batin tersiksa ka ini..jadi de tanya sama Obet dia…

Yakob : Seeeechh Obet ko tau ini perempuan siapa yang menyanyi di Radio ni…

Obet : aeh..macam ko tra tau saja itu artis yang de pu nama Itu Meriam Belina

Pace Yakob diam- diam pulang ke rumah…tiba di rumah Yakob tra pikir panjang lagi de ambel kertas HVS dan bolpen langsung de tulis Surat …

kepada

yang tersayang Dik Meriam Belina
di Jakarta

Salam Pramuka…!!

Meriam Belina yang cantik dan manis seperti susu Belanda campur dengan alvokat Serui saat saya dengar suara mu mengalun merdu di pita kaset…sa pu hati ini seperti ko penjarakan di bawa pemerintahan Pontius Pilatus…ko bikin sa makan tra kenyang tidur tra nyenyak kencing pun putus..putus…adohh­ ade kaka sayang tapi gunung dan laut su pele jadi nanti kaka berenang saja…

Yakob de tanda tangan langsung taruh cap kepala kampung di bawah lagi karena Yakob de kira Meriam Belina itu kepala distrik…ka apa… Hahahahah
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.