IBUKOTA PROVINSI PAPUA KE WAMENA

Ada anak Paniai satu, de pulang sekolah langsung lari cepat-cepat ke de pu kamar.

Trus de berdoa : “Tuhan, tolong pindahkan Ibukota Provinsi Papua dari Jayapura ke Wamena. Terimakasih Tuhan. Amin”.

De pu mama dengar de pu anak doa.

Mama ni tanya de pu anak : “Kenapa ko berdoa begitu?”

Anak ini jawab : “Ado mama, tadi tong ujian semester geografi, baru sa jawab Ibukota Provinsi Papua tu di Wamena”.

Mama, “Dasar ko ini…”

INSOS DAN NAP PU MALAM PERTAMA

Ini malam pertama jadi mace Insos deng pace Nap mo kerjakan dorang pu kewajiban
Tapi gara-gara mace insos takut... jadi Insos minta dia  pu mama supaya tunggu depan pintu kamar....

DIa bilang mace ko bantu dia, dia takut kalo ada masalah dalam proses kewajiban ka ini. Jadi Insos dia kasih suara dari dalam kamar....

Insos dia bilang : "Mama,... sa lapar"

Mace de kaget baru masuk dan lihat begini Insos dengan Nap su makan ayam goreng..

Mace kira dorang su bikin kaco didalam...

BAPA ADE DI PENERBANGAN

Ni ada tikus kecil satu dengan de pu mama di bawah pohon gersen dekat kali.

Tiba-tiba ada kelelawar kecil terbang kikis dong dua baru tikus pu anak tanya sama de pu mama.

Anak : "Mama itu siapa ka ?"

Trus de pu mama bilang : "Itu bapa ade yang kerja di bagian penerbangan..."

Trus tikus kecil bilang : "Kalau begitu, nanti pas sa besar, sa juga bisa sekolah di bagian penerbangan eee"

SEPNA HAMIL

Satu remaja ni dia pu nama SEPNA, dia lagi mengadu sapa dia pu mama, tentang dia pu kehamilan..

Sepna : "Maaaaa... sa mo bilang sesuatu... tapi mama jangan marah sa e??!"

Mama : "Yo' kas tau sudah, ko mo bilang apa kaaa?"

Kemudian Sepna peluk dia pu mama sambil dengan nada pelan dan takut-takut, dia atur dia pu kata-kata,

Sepna : "Ma, sepertinya, Sepna hamil ma.."

Mama : "Apaaaaa!!!... ko bilang apa?, ko stop bicara sudah..."

Sepna : "Sepna minta maaf ma.... mama ko jang marah kaaa?"

Dia pu mama diam sebentar, trus sambung lagi.

Mama : "Mungkin ko kecapean tu, ko pigi istirahat, tidur sudah... "

Sepna : "Tapi akhir-akhir ini Sepna, mual-mual terus maaa...???"

Mama : "Ahh... paling ko masuk angin kapa.. Ini mama kasi uang ko pake beli minyak kayu putih , ko gosok ko pu perut baru ko pi tidur sudah, besok pagi, pasti ko badan su enak..."

Sepna bukan tambah tenang, tapi dia malah menangis..

Sepna : "Ghiii... hi.. hiiii.. hiii.. hiks..., Maaa... Sepna tra masuk angin, sekarang ini Sepna bawaannya mo makan yang asam-asam terus, maaa..."

Mama : "Akkhhhh.... ko pu sariawan yang bikin ko begitu... makannya, jadi orang tu jang terlalu rakus."

Sepna : "MAAAA.... Tolong kah, Ma, kali ini Sepna tra tipu, mama kenapa tra pernah mo percaya Sepna kaaaa?????"

Mama : "SEPNAAAAAAAAAATT...  Ko STOP bicara sudah! OTAK MATI... BANCI tu trada RAHIM, jadi ko STOP menghayal!!!!!!!!!!,, Ko bicara satu kali lagi, blanga-blanga ini pica di ko pu kepala.... Tidur sana KASKADO."

WARUNG BIAK TIMUR

Satu kali nih napi kecil deh pulang sekolah dalam keadaan lapar hancor.

Anak : "Mamaaa..!! Sa lapar.."

Mama : "Yoo mama ambil ko pu makan ee.."

Anak mengeluh: "Mama nih makan apa kaa... Masa cuma sayur dengan ikan asin saja tuh...? Kenapa tidak makan telur, kerupuk, tempeh kapa kaa..."

Langsung de mama jawab di de pu telinga pelan-pelan sambil pegang kayu bakar.

Mama : "Anak ko makan saja sudah...! Nih bukan warung Jawa Timur... Ini warung Biak Timur jadi... Ko pikir ko pu kata-kata ulang ee..."