KAMAR DI SAMPING WC DISEWA

Pace ni karna su asik di Jawa trus ketemu dengan perem-perem cantik.

Jadi pace su lupa dengan istri, pace tra telepon-telepon deng kirim uang lagi. Karna begitu, mace de jual diri untuk penuhi kebutuhan hidup.

Begini su satu stengah tahun baru tiba-tiba pace de telepon mace.

Pace : "Mama... adooo.. papa minta maaf, su tra telepon hampir satu tahun ni...."

Mace : "Ahhh.... tarapapa, masalahnya sudah satu stengah tahun ini baru pace ko telepon... ko bikin apa saja??"

Pace : "Adoo, itu lagi.. papa sibuk skali urus tugas yang menumpuk ni, baru mama deng anak-anak kabar baik???"

Mace : "Sa deng anak-anak sehat saja... tapi untuk bapa ko tau saja, kalo kamar yang disamping WC tu, sa su sewa untuk biaya hidup deng sekolah anak-anak..."

Pace de tra mengerti mace pu maksud, baru pace de sante-sante jawab : "Tarapapa sudah mama.... nanti papa pulang baru papa rehab kamar tu untuk bapade de pake"

PERSAMAAN PLN DAN PAM

Ada pace satu, dia pu kompleks ini tinggal mati lampu, trus dari pagi sampe balik pagi lagi tra mnyala-myala.

Pace ko ganas eeh, jadi dia tanya tetangga di sebelah, mau minta nomor telponnya PLN. Bru donk kasih, pace ko dia telepon dengan nada marah.

Pace: "Halo, selamat pagi"

Yang terima telpon : "Met pagi juga, ada yang bisa saya bantu??"

Pace : "Iyo kam PLN ini bgmn,,? Tonk su bayar listrik mahal-mahal, bru kam pelayanan tidak baik sekali. Di tonk pu kompleks lampu su tra nyala satu hari satu malam."

yang terima telpon : "Ouw maaf pak,, ini bukan PLN, ini PAM..

Karna su malu pace langsung cari alasan lain.

Pace : "Ahh kam dua PLN sama saja,,!!! Baru kenapa tadi pagi air tra jalan,,,!!"