PENCURI PISANG DI PACE PU KEBUN

Pace satu dia ada bikin kebun pisang di satu pulau yang kosong. Jadi setiap kali napi mau pergi panen  pisang sudah ada orang yang pergi panen duluan, Pace emosi skali.

Pas musim panen berikut, de bikin pondok di kebun untuk tidur jaga-jaga pencuri jadi napi sambil tidur tiba-tiba ada Mace satu menggayuh perahu menuju pulau yang pace ada tanam pisang dan mace sandar perahu langsung tebang pisang-pisang di situ.

Pace berteriak: "Iyoo mace ko tebang, ooo bikin macam ko yang tanam pisang saja!"

Mace karena kaget langsung mace bilang: "Boo... pace saya minta maaf sekali, kalo begitu pace ko hitung sudah brapa nanti sa bayar..."

Pace dia diam baru dia cuma jawab: "Sudah-sudah! Potong daun pisang baru buat alas di situ... jangan bicara banyak lagi..."

Pencuri Ikan Cari Alasan Kasi Mandi Cacing di Kolam Ikan

Pace satu de mati mancing eeee.

Trus de pergi ke kolam.

Tapi disitu ada tulisan “ dilarang mancing” tapi pace hajar saja.

Deeee pasang cacing dimata kail dan langsung lempar ke kolam.

B’gini ada pace yang punya kolam bilang : “Bapaaaa ko k’napa mancing disini?, su dapa larang baruuu??

pace beladiri, baru bilang, “ahhhhh sa Cuma kasi mandi cacing saja mooo, kamm marah2 sampee….”

NAMA MARIA

suatu malam.. tete deng nene ada tidur.

tra lama kemudian.. ada seorang pencuri masuk kerumah. dan de todong senjata tajam ke nene pu leher.

nene deng tete gementar dan takut..

pencuri ini bilang..
" kam jang berteriak.. kalau berteriak.. sa bunuh kam dua !

akhirnya tete deng nene diam.

trus pencuri tanya sama nene.. sambil taru parang di nene pu leher.
" eh.. nene.. ko pu nama siapa ?

nene jwb dgn nada gementar..
" sa.. sa pu nama maria .

pencuri langsung bilang..
" adoh.. sa tra jadi bunuh ko nene... nene ko pu nama sama dengan sa pu mama dirumah.

langsung de kas pindah parang ke tete pu leher.. dan de tanya..
" eh.. tete.. kalau ko pu nama siapa ?

tete jwb dgn nada gementar..
" saa.. sa pu nama... Obet.. tapi biasa anak;anak di kompleks panggil sa maria .

haha... takut sampe salah karang nama

DIANTARA NAFSU DAN PENCURI KELADI

Tete deng Nene dong dua pi Cabut keladi dikebun...Selesai Cabut Tete deng Nene bawa pulang kerumah...

Tapi ditenggah jalan Tete ingin Main skali jadi Tete bilang Nene taruh Keladi di pinggir jalan situ dlu baru dong masuk ke Hutan2...

Pas Tete deng Nene selesai Kerja Bhakti dong dua keluar dari Hutan Keladi orang su Pencuri...

Nene de marah skali sama Tete jadi Nene de bilang...

Nene : Gara2 Ko pu Nafsu Biadap tuh akhirnya tong pu Keladi orang Pencuri...

Sambil senyum2 Tete bilang sama Nene...

Tete : Nafsu de tra salah...Yang salah tuh Orang yang Pencuri keladi tuh...

HAFAL NOMOR PIN ATM

Jon dengan Dani ada rencana mo curi uang di Mesin ATM di Saga Abepura. Jadi Jon suruh Dani supaya intip nomor PIN orang yang masuk di kamar mesin ATM.

Selesai intip cukup lama, Dani datang ke Jon sambil senyum-senyum.

Jon :" Bagemana Dani, ko berhasil hafal dong pu nomor PIN kah?"

Dani : "Beh...gampang skali, sa satu kali lihat langsung tau moo,"

Jon : "Ah, yang be, ko hebat skali... memang dia pu nomor PIN berapa?"

Dani :"Semua nomor PIN tu sama, pas ada orang masuk, sa perhatikan di monitor, nomor PIN nya yang muncul tuh bintang... bintang.... bintang.... bintang... bintang."

TIDUR DENG AYAM

Satu kali Yaklep pancuri ayam baru ketahuan, jadi de dapat kejar.

De lari terus tapi napas su habis jadi Yaklep lompat ke alang-alang.

Yaklep bikin diri tidur sambil polo ayam satu.

Orang-orang yang kejar Yaklep dapat liat de sembunyi di alang-alang baru peluk ayam.

Orang-orang : ”Woi pencuri, ko bangun tempo!."

Yaklep bikin diri kaget bangun, trus lempar ayam : ”Jiiii, sapa pu ayam yang tidur deng sa ini???”

BAPA MINCE

Pace Kaleb dan de pu istri mace Mince, dong dua baru kasi cair dong dua pu dana proyek d bank.

Pas dong dua dalam perjalanan pulang ada perampok yang ikut dong dari belakang dan hadang pace Kaleb pu mobil de jalan trus pace perampok datang sambil taru piso di Mince pu leher

Perampok : "Kasi kam dua pu uang ato sa bunuh kam dua."

Kaleb : "Pace jang ko bunuh saya ko ambil uang ini sudah."

Setelah Kaleb kasi uang. Perampok tetap saja mau bunuh Kaleb dan de pu istri.

Perampok : "Tapi sebelum sa bunuh kam dua sa mau tau kam dua pu nama."

Dan langsung de tanya ke Kaleb pu istri.

Perampok : "ko pu nama sapa??"

Mince : "Sa pu nama Mince"

Perampok : "Haduu... sa mau bunuh ko tapi sa pu mama juga nama Mince jadi...sa tra jadi bunuh ko..."

Karna tra jadi bunuh mace Mince, perampok langsung tanya ke pace Kaleb.

Perampok : "Kalo ko,...ko pu nama sapa??"

Kaleb dengan suara kecil macam tikus tajepit, jawab : "Sa.... pu.... nama... bapa... ....Mince"

PEGANG DI BATANG KANGKUNG

Sekarang ceritanya ada pace satu da su kelaparan jadi da mo pergi mo curi kangkung di kolam kangkung belakan Kampus Uncen Abe untuk de makan

Trus pas pace pencuri ko ada tunduk baru asik petik-petik orang pu kangkung begini orang yang punya kangkung ini lewat baru batariak sama pace pencuri : "Wooii...ko bikin apa tuhh, ko mo curi sa pu kangkung kah????"

Pace pencuri de kaget tra baik, de jongkok sambil mundur.

Baru de angkat : "Ah.. trada moo... Angin kencang jadi sa pegangan di batang kangkung nii...."

TUHAN TIDAK AKAN KASI TAW KO

Jadi satu kali ini ada pace satu di Manokwari da pu pohon mangga su berbuah lebat skali jadi karna pace takut orang-orang pancuri makanya pace ko tulis di papan kecil satu.

"JANGAN KAM PENCURI SA PU MANGGA INI, SUPAYA KAM TAU SAJA. BIAR SA TRA LIAT TAPI TUHAN LIAT."

Baru pace paku papan itu di pohon.

Trus besok pagi pas pace ko bangun baru pace ko cek da pu pohon mangga bgini mangga su habis.

Baru pas pace buang muka ke da pu papan kecil yang da paku tuh.

Pace liat ada tulisan tambahan yang pencuri ko tulis di bawah tulisan yg pace tulis.

"SA MEMANG TAU KLO TUHAN LIAT SAYA, TAPI SUPAYA PACE KO TAU SAJA BIAR TUHAN LIAT, TAPI TUHAN TIDAK AKAN KASI TAW KO.".

TUHAN NYANDA KASE TAU PANGANA

Ada orang Manado punya satu pohon rambutan yang buahnya lebat, tapi karena takut dicuri lalu dia tulis dipapan.

"BIAR KITA NYANDA LIA PANGANA, TAPI TUHAN LIA PANGANA...!"

Kemudian tulisan tersebut di tempelkan di pohon rambutannya yang berbuah lebat.

Besok harinya dia lihat buah rambutannya telah habis dicuri dan si pencuri menulis di bawah pohon :

"BIAR TUHAN LIA PAKITA, TAPI DIA NYANDA MAU KASE TAU PANGANA."

PENCURI IKAN GORENG BUMBU POTAS

Suatu pagi ada anak satu de ada goreng ikan, trus dia taru di meja.

Setelah itu anak ini pergi main-main, siangnya dia balik kerumah mo ambil ikan yang dia su goreng tu.

Dia cari-cari tapi tra dapat-dapat, padahal tadi dia ingat kalo dia ada taru di meja.

Anak ini liat dia pu bapa yang ada tidur sante di para-para.

Dia tanya dia pu bapa : “Bapa eeeeeee siapa yang makan ikan di meja kaaaaa????”

Bapanya jawab : “Anaaaak... bapa tidak tidak tau siapa yang makan eee…”

Anak : “Bapa baaa...  boooo ..!!! siapa yang makan ikan ituuuuu ..”

Bapanya jawab lagi : “Anaaaak... bapa su bilang tooo bapa tidak tau, nanti bapa cek, siapa yang makan ko pu ikan goreng tu!!”,

Jadi anak ini mulai taru menangis, dia pu bapa tanya dia : “Kenapa ko menangis kaaaa ??”

Anak : “Sa menangis karna ikan tadi Itu saya goreng dengan potas”

Dia pu bapanya kaget : “Ba...? betulkah?……. boooo ..anak!.. ,ikan tadi bapa yang makan.”

Abis itu pace pu poro taputar....

BARU LEWAT PAGAR, SU BATARIAK

Suatu hari pace satu dia ada pergi mau mencuri di rumah mas Jawa malam hari.

Ternyata rumah mas Jawa sudah dikasih pagar tinggi, dan dorang kasih tembok sekeliling rumah.

Pace pikir: “Ko kira sa tra bisa mencuri kah, biar ko kasih tembok sa tetap bisa panjat ko pu tembok. Ko liat saja.”

Lalu pace dia panjat mas Jawa pu tembok yang tinggi. Mas Jawa dia liat ada orang yang mau mencuri dia berteriak keras: “Heeyy…!! Pencuri kah..! Ko cepat turunnn…!”

Pace dia kaget dan hampir jatuh, tapi dong balik marah ke mas Jawa : ” Hey mas jawa…. coba ko pu cara tegur itu yang baek kah ?! memang sa pencuri, tapi kalo ko berteriak, sa kaget, truss sa jatuh…. siapa yang bayar ongkos rumah sakit ?. Sa pu anak siapa yang kasih makan..? Saya toh belum mencuri, saya baru lewat ko pagar saja ko su batariak…!”

Mas : “????!!”