KETUA KLASIS ADA DI KAMAR SEBELAH

Begini ada pace satu yang tiap hari miras deng main perem baru jarang sembayang di gereja de meninggal.

Di akhirat begini, pace dapa suru masuk neraka karna de pu dosa yang tatumpuk.

Masuk ke pintu gerbang neraka begini de liat banyak orang ada dapa siksa baru yang lain ada tunggu giliran sambil duduk-duduk.

Begini pace kaget karna pace ketemu dengan de pu gembala gereja.

Pace : "Bahhhh... pa pendeta di sini juga ka???"

Pendeta de cepat-cepat suru de diam baru bilang : "Stttt... ko jang bicara keras..., Ketua Klasis juga ada dikamar sebelah."

PACE MABUK MO MAKAN DI WARUNG

Pace satu dia mabok setengah berat, trus dia jalan menuju ke warung.

Sampai di depan warung dia tanya sama mbak penjaga warung.

Pace : "Mbak ada ayam ..ka ?"

Mbak : "Ada mas..."

Pace :"Ada sapi..ka?"

Mbak : "Ada mas...mari mas...!"

Pace : "Kalau kambing...?"

Mbak : "Ada mas ..mari ..silakan masuk...mas....!!"

Pace : "Eehh....bebek ada..ka ?"

Mbak : "Iya...mas ada...monggo mas.."

Langsung pace bilang sama mbak

Pace : "Kalo begitu suruh dong smua kluar, sa mo masuk makan"

Mbak cuma diam kebingungan.

PHOTO COPY

Ada pace dua, dong dari kampung trus lagi jalan-jalan di kota.

Pas dong dua lewat di depan tempat Fotokopi,trus pace yang satu de balik lihat tulisan "PHOTO COPY" trus dia baca.

Pace 1 : "P..H..O..T..O  C..O..P..Y" ( huruf C tetap di baca C, bukan K )

Pace 2 : "Ah... teman bukan baca begitu, baca begini ; P..H..O..T..O  K..O..P..I" ( huruf C dibaca K )

Pace 1 : "Oh..begitu ka... berarti kalau CICAK nanti tong baca ...KIKAK,."

Pace 2 : "......#@*!!????"

HABIS MAKAN BAYAR

Ada Pace satu nih de dari kampung pi jalan-jalan di kota.

Karna lapar, pace ko masuk makan di warung, de pesan makanan sekitar tiga porsi baru de makan. 

Karena talalu enak, de kunyah makanan dengan rakus.

Jadi mas yang punya warung bilang : "Pace ko kenapa,... makan kaya babi saja!!, tra bisa pelan ka?!!"

Tapi pace ko diam saja dan habis makan dia langsung bergerak keluar warung.

Trus mas yang punya warung bilang : "Pace, ko belum bayar makan ?"

Pace de jawab : "Mas... sejak kapan ko lihat babi habis makan, bayar ?"

Mas :......!!!%#$@*

ZELAMAT MALAM

Ada pace satu dong bilang dia tu MC Profesional, sebab dia biasa jadi Pembawa Acara untuk pesta-pesta di kampung.

Begini pas pelantikan dong pu kepala dusun, pace ada tes mic dengan de pu suara-suara berat ka ini,...

Zaudara ..

Zaudari..

Zedusun..

Zekampung...

Zekecamatan...

Zekabupaten...

Zeprovinsi...

Zeibukota...

Zeindonesia...

Zeasia...

Zedunia...


Ze....

...lamat malam