KASBI MASIH PANAS

Pace satu de piara babi, baru tiap hari babi de makan nasi.

Sekarag beras ada mahal jadi terpaksa pace suruh de pu anak laki-laki masak kasbi utk Babi.

Pas kasih makan begini, babi tramau, anak paksa-paksa juga tapi babi tetap tidak mo makan kasbi.

Jadi anak lapor de pu pace, pace tra percaya, jadi pace pi lihat,  betul babi tra mo makan.

Pace emo jadi pace bilang dengan suara keras sama de pu anak.

Pace : "Anakkk... ko tolong lihat bapa pu parang panjang di dapur dulu!"

Langsug babi de jawab : "Yo..plan-plan to..kasbi masih panas ni! nanti kalo su dingin baru sa makan!"

Pace balas : "Sa juga cuma tes ko mo! ko mledak sampe!"

SARJANA TUKANG OJEK

Pace Minggus de tinggal lama di Jawa dan baru datang pertama kali seumur hidupnya ke jayapura. trus de mo pergi ke sodaranya di Abe tp de tra tau Abe itu di bagian mana.

Karna pace de orang baru dan masih bingung liat jalan akhirnya pace de coba untuk bertanya sama orang, karna de ingat de pu Guru pernah bilang "malu bertanya, sesat di jalan".

Dia tanya pertama sama mace-mace yang jual pinang dekat situ,

Dominggus :"mama, kalau kita mau Abe naik taksi yang warna biru kah ?"

Mace Penjual Jagung jawab : "U, uuhhh.. .!" (Sambil angkat kepalah)

Pace dominggus da bingung, trus dia pergi tanya lagi sama pace Yakobus yang duduk sambil jual dia punya jagung bakar.

Dominggus :"permisi bapa, mau tanya kalau kita mau ke Abe itu naik taksi warna biru ka ?"

Yakobus : "Yombex. .(sambil kipas-kipas dia punya jagung bakar. .) "

Bah, pace dominggus de tambah bingung lagi. Trus dia pergi tanya pace ojek.

Dominggus : "Bapa, kalau angkot yang warna biru itu menuju ke abe ka ?"

Ojek : "Ya, betul..!! emanknya kenapa sih..?"

Dominggus : "Tadi sa tanya sama mace yang jual pinang di jawab 'uu,uuh..' truz sama pace yang jual jagung bakar dia jawab, 'yombex. .' sekarang sama bapa sendiri jawabannya 'ya, betul.."

Ojek : "Begini Pace.. kalau yg jawab, 'u, uuhh..!! itu dia orang tidak sekolah. Trus yang jawab, 'yombex..' dia sekolah tapi tra betul-betul. Sedangkan yang jawab, 'ya, betul..' itu, dia sudah sarjana.

Dominggus : "Oooo, . Jadi bapa ini sarjana ka?"

Pace ojek de bangga skali dan langsung jawab : "U, uuhh.."

KESAKSIAN KLINIK TONG FANG

Pace satu dia diajak shoting untuk iklan pengobatan TongFang.

Pas sutradara bilang, "Action!!!"

Pace langsung bicara : "Dulu saya kencing batu... tapi semenjak berobat di klinik TongFang, kencing saya berubah jadi semen .. Trimakasih klinik Tongfang!!! kini saya sudah bisa bangun rumah ..."

PACE MO SEMEN GIPS

Ada pace satu dia pu tangan patah, dia langsung dibawa kedokter spesialis.

Abis dironsen, dong tau kalo dia tangan patah, jadi dokter bilang pace pu tangan harus di gips.

Pace setuju. setelah di gips pace bilang Dokter : "Ya ampun kam semen sa pu tangan pake semen putih ka??, tadi kalau sa tau begini, Sa lebih baik semen sendiri di rumah. Masalahnya tadi tu sa jatuh ke karung semen dinding deng semen putih."

Dokter cuma ba-bingung saja.

KAMPUNG PANTUN

Di satu kampung ni, stiap orang yang ada di situ kalo bicara harus diawali dengan pantun.

Satu kali begini anak satu, dia pu nama Markus.

Dia pulang main bola, masuk rumah buka tudung lihat bgini, makanan su habis.

Jadi dia pu tete kasi pantun : “Nasi uduk campur lalapan, Markus pulang Kelaparan”

Markus su ganas jadi dia balas pantun : “Kucing kurus mata manyala-manyala.. tete tua otak mati ko top cari gara-gara sudah…!

NARUTO : NAPI RUMKOREM TO

Napi tiga orang dong duduk kumpul di terminal Biak. Mansar Obet ko lewat depan dong tiga baru de tanya...

Obet : Mili... kam tiga liat Naruto ka???

Nap dong tiga kaget... dong bale tanya Obet... "Bah Naruto itu sapa???"

Obet : Naruto itu NApi RUmkorem TO...