Showing posts with label PACE DAN MACE. Show all posts
Showing posts with label PACE DAN MACE. Show all posts

MACE MO LIAT LIAT BLACKBERRY


Ada pace deng mace satu, pace ni ada asyik main-main dia pu hape BlackBerry, begini dia pu mace bilang ke pace.

Mace : "Bapa...  sa pinjam bapa pu bb dulu ka??"

Pace kaget baru pace jawab : "Sebentar ee mama, sa kasi menyala bb dulu..."

Pace gerakan cepat klik-klik

Delete Porn Video..
Delete Porn Picture..
Delete Private Folder..
Delete Number Called perem-perem..
Delete PIN BB perem-perem...

Diana, delete
Henny, delete
Mila, delete
Lia, delete
Prita, delete
Chayang, delete
Mami2, delete
Cinta, delete....

... wusss...

... Format Memory Card : OK ..

Pace : "Ini maa... bb-nya, memang mama mo liat apa kaa?, bapa belum sempat simpan apa-apa di situ..."

Mace : "tarada... sa cuma mo liat sekarang jam berapa!!!"

Pace langsung muka pamalas.

BAPA MINCE


Pace Kaleb dan de pu istri mace Mince, dong dua baru kasi cair dong dua pu dana proyek d bank.

Pas dong dua dalam perjalanan pulang ada perampok yang ikut dong dari belakang dan hadang pace Kaleb pu mobil de jalan trus pace perampok datang sambil taru piso di Mince pu leher

Perampok : "Kasi kam dua pu uang ato sa bunuh kam dua."

Kaleb : "Pace jang ko bunuh saya ko ambil uang ini sudah."

Setelah Kaleb kasi uang. Perampok tetap saja mau bunuh Kaleb dan de pu istri.

Perampok : "Tapi sebelum sa bunuh kam dua sa mau tau kam dua pu nama."

Dan langsung de tanya ke Kaleb pu istri.

Perampok : "ko pu nama sapa??"

Mince : "Sa pu nama Mince"

Perampok : "Haduu... sa mau bunuh ko tapi sa pu mama juga nama Mince jadi...sa tra jadi bunuh ko..."

Karna tra jadi bunuh mace Mince, perampok langsung tanya ke pace Kaleb.

Perampok : "Kalo ko,...ko pu nama sapa??"

Kaleb dengan suara kecil macam tikus tajepit, jawab : "Sa.... pu.... nama... bapa... ....Mince"

BABI MAKAN WARUNG


Ada pace satu nih piara babi banyak sekali.

Satu hari bgini pace ko pi mabuk-mabuk sampe pagi baru pulang ke rumah.

Pulang dari acara mabuk pace ko langsung kipas tidur.

Karna pace ko blum kas makan babi-babi jadi babi-babi nih tinggal batariak-batariak dari kandang. Mace dengar jadi mace kasih bangun pace yang ada mo tidur itu.

Mace : "Woi, pace ko bangun tempo, babi-babi di kandang su lapar tuh!!"

Pace: "Ah, sa malas, ko tra liat sa ada enak-enak tidur k??"

Akhirnya mace ko pergi ke kandang.

Tapi karna babi nih tinggal ribut trus, jadi mace tinggal bolak-balik kas bangun pace dia.

Mace : "Bah, ko bangun tempo sudah, babi su trlalu ribut skali tuh!!!!"

Sambil tarik uang 50 ribu dari saku, pace bilang : "Ini, ada 50 ribu, ko pi bawa babi-babi dong makan di warung sana sudah!!!"

MACAM GURU PENJAS


Suatu hari pace satu da pulang kerja trus da capeeeeeekk skali.

Pas da pulang da pu mace trada di rumah cuma da pu anak saja. Pace ko emosi, Langsung da tanya da pu anak.

Pace : "Eh.. ko pu mama mana??"

Anak : "Lagi main voli."

Pace : "Ahhh… ko pergi panggil ko pu mama sana. Bapa pulang kerja tuh bikin teh atau masak apa kah begitu.. Ko pergi panggil !! Bilang ko mama tempo!"

(Pas da pu anak su panggil da pu mama pulang. Pas tiba dirumah begini, langsung dapat ceramah dari da pu suami).

Paced : "Ko ini suami pulang kerja tuh masak atau bikin teh atau apa kah.. dari dulu sa kenal ko ini, ko tra pernah main voli mo. Ko terlalu bikin ko ATLET skalii..!!!!"

Langsung Mace dia balas : "Akhhh… ko tuh marah-marah trus nanti, malam-malam baru ko tinggal suruh sa balik sana-balik sini, suruh jongkoklah !! ko suruh sa kayang!! ko bikin.. macam ko GURU PENJAS saja!!

PACE PU DUA PROYEK


Ada pace satu de pengacara (pengangguran banyak acara). Saban hari cuma jalan bawa map isi proposal.

Dia pu maitua yang cari nafkah jualan sayur di pasar Remu dan tiap hari pace tinggal minta-minta uang sama mace pake jalan dan flai.

Lama-lama mace mulai bosan dan marah-marah.

Trus teriak-teriak : "LAKI-LAKI TRA TAU DIRI.. KERJA MINTA-MINTA WAN SAJA DAN TIAP HARI MABOK.. BIKIN MALU SAJA!!!"

Pace langsung malu 'abis banyak orang ikut dengar mace teriak-teriak.

Jadi dia bilang sama mace: "Ade ko tenan saja sebentar lagi kaka pu dua proyek mo picah!"

Langsung mace berenti teriak dan tanya: "Ah kaka yang benar????? proyek apakah???"

Pace rapat ke mace telinga baru bisik : "Ada dua proyek yang mau picah... kalo tidak ko pu mata picah brarti ko pu bibir picah.. ko pilih mana!!??"

PACE DAN MACE DI BALI


Ada pace dan mace ni, dong dua paling hemat sekali eee, sekarang dong ada jalan-jalan di Bali.

Pas pace deng mace dong mo jalan, dong kasih stop taksi argo satu.

Trus pace de tanya ke supir : "Om supir, kalo ke pante satu orang bayar berapa kah..."

Om sopir de jawab : "Begini pak, kalo orang dewasa 50.000, kalo anak-anak gratis saja pak...."

Tralama pace ko panggil de pu anak-anak tiga orang : "Anak-anak kam mari dulu, kam ikut taksi ni eee ke pante Kuta....nanti bapa deng mama ikut angkot saja sudah dari belakang....."

TANGGUNGAN GARA-GARA SELINGKUH


Yusak dan Mince adalah pasangan selingkuh, setelah melakukan hubungan, dong dua pun saling ngobrol.

Yusak: "Mace, kenapa sa kemarin dengar ko maki-maki ko pu laki kah ?? ko bilang "BABI KOE, ANJING KO, BANGSAT KO" ko knapa tuu .....???"

Mince: "setelah tong dua berhubungan, sa pu laki dia bilang kalo susah dan senang tong dua harus tanggung sama-sama"

Yusak : "Itu brarti bagus toh mace, susah senang kam dua sebagai suami istri tanggung sama-sama, trus knapa sampe ko maki dia bagitu lagi"

Mince: "Habis setelah tong dua berhubungan dia baru bilang dia klo dia kena AIDS"

Yusak : "BABI KOE, ANJING KOE, BANGSAT KOE, knapa koe baru bilang ...."

Mince: "TENANG PACE, SUSAH SENANG TONG DUA TANGGUNG SAMA SAMA".

Yusak : "^&%$#^$%"

SAYANG KO NAIK OJEK SUDAH


Ada Mace satu ni de ikut pelatihan guru bahasa indoneisa di Hotel Serayu sampai sore.

Pas pelatihan su berakhir mace ko sms de pu suami untuk jemput karena lagi hujan....

De pu sms : " Pa jemput mama dulu.."

Trus de pu suami balas : "Sayang demi cinta ku padamu laut kan ku sebrangi... Gunung kan kudaki, Tapi hujan-hujan begini.....! sayang ko naik ojek sudah...e!"

Mace esmos...

TRIK BAKU BAIK DENG PACE


Ada pace deng mace dong dua bakalai, trus pace de mo kas tinggal de pu maitua jadi pace de jalan keluar rumah.

Mace : “Bapa baru anak-anak”

Pace : “Ko ambil sudah”,

Mace bilang : “Bapa baru rumah, motor, barang-barang ni….”

Pace jawab : “Ko ambil sudah.”

Mace de cari akal, begini mace angkat Rok trus Mace bilang : “Bapa baru ini ni…..”

Langsung pace ko jawab : “Mama sa kedepan beli rokok dulu, nanti sa bale…..”

JANGAN MEMBANGUNKAN AKU


Ada pace satu de mabuk dengan de pu teman-teman.

Dong dari hari sabtu malam sampe pagi, de mo pulang ke rumah tapi su tra kuat jalan jadi, pace de sleep di samping gereja.

Pas pagi bgini de pu maitua dong mo ke gereja dpat lihat pace de tidur di samping gereja.

Karna orang-orang yang mo ibadah lihat pace tidur dong mau kasi bangun tapi dong takut pace dia,... .,

Mace tra enak dengan orang-orang jadi mace ko kesana kasi bangun pace dia

Mace : "Pace ko bangun sudah,.. ko pi tidur rumah sana,..ini tempat ibadah ko jangan tidur sini."

Karna pace rasa terganggu jadi pace balik angka muka ke maitua dia baru pace d bilang

Pace : "Jangan membangunkan aku di Rumah Bapak-Ku"

Mace d diam dan langsung masuk kedalam gereja,

Tapi dalam hati mace bilang : "pace ko tunggu di rumah,.,!!!
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.