ASAL MULA MANUSIA

Obet pulang sekolah langsung dia cari dia pu mama, pas ketemu dia py mama langsung dia tanya:

Obet : Mama.. Bagamana sampai ada manusia..???

Obet pu mama jawab

Mama : Jadi obet.. Tuhan menciptakan Adam dan Hawa. Terus dorang dua punya anak2, anak2nya punya anak2 lagi.. begitu sampe Mama bisa dapat ko sebagai anak..."

Besoknya Obet de tanya sama de punya Bapak.

Obet : Bapak.. bagaimana sampai ada manusia..???"

De punya Bapak jawab..

Bapak : Begini Obet... berjuta-juta tahun yang lalu ada kera yang perlahan-lahan Berevolusi menjadi manusia.

Obet langsung jadi bingung, Obet kembali tanya ulang lagi sama de pu Mama...

Obet : Mama.. kenapa Mama bilang manusia diciptakan Tuhan, tapi Bapak de bilang Manusia berasal dari kera...??

Langsung Obet pu Mama senyum2 Trus jawab...

Mama : Ooooooohhh..... klo Yang Mama cerita itu tentang Mama dong punya keluarga...

Tratau Klo yang Bapak de cerita itu Mungkin tentang Bapak de pu keluarga ka apa....... trus obet mau ikut Mama atau Bapak...??

IPAR KO SIRAM

Satu kali ada pace duduk siram dengan de pu anak laki-laki, dari sore sampe malam ka ini. Jadi dong dua su mabok berat.


Karena su kena miras jadi anak ko angkat kata : "Ipar ko siram.....!!!"


Pace su dengar tapi pace pikir orang lain yang de pu anak panggil... Anak ko panggil lagi dan pace ko marah


Pace : Eh anak!!! sa tu ko pu bapa bukan ko pu ipar!!!


Anak : Ah kan ko kawin deng sa pu mama to jadi sa panggil ko ipar...

ANAK CEREWET BAPA STRESS

Jon dengan dia pu Bapa ada duduk nonton TV, baru Jon ni ada ganas dia pu bapa karna tra kasi dia pu hadiah ulang tahun, kemarin. Begini dia pu bapa mo suruh dia.

Bapa : "Jon, ko ambil bapa pu air minum kah ?!!"

Jon : "Air teh ka air putih?"

Bapa : "AIR PUTIH !!!"

Jon : "Yang panas kaa... dingin?"

Bapa : "Ahhh... ko beli minuman soda sudah, di kios depan..!!"

Jon : "Coca cola ato pepsi?"

Bapa : "coca cola"

Jon : "yang botol ka,,, kaleng?"

Bapa : "Yang botol!!"

Jon : "Besar kaaa... kecil??"

Bapa su ganas jadi mo ancam Jon dengan mo pukul dia dengan sapu.

Bapa : "SAPU MANA SAPU ??!!"

Jon : "Sapu ijuk kaaa sapu lidi?"

Bapa : "Bahh... ko ini, dasar…..binatang!!!"

Jon : "Monyet kaaa.. sapi?"

Bapa : "Ehhh ko stop melawan, Ko pergi dari rumah ini sudah …!!!"

Jon : "Sekarang kaaa.. besok???"

Bapa : "SEKARANG !!!"

Jon : "Bapa moo ikut ka tidak??"

Bapa su ganas, jadi batariak dia : "SA BUNUH KO  SEKARANG...!!!

Jon : "Tusuk sa pake piso kaaa.... tembak pake pistol??"

Bapa : "Tembak pake AK47 !!!

Jon : "Di kepala kaaa.. perut ?"

Bapa : "HAMA SIALAN !!!"

Jon : "Tikus kaa.. kecoa ?"

Jon bapa pu kepala su taputar,  pace stress, langsung keluar dari rumah.

OPM

Anak kecil satu de main layang-layang, satu hari pak polisi tahan layang-layang tersebut karena ada tulisan 'OPM'.

Si anak pulang sambil cigi  menangis!

Bapaknya tanya : "Ko tenapa menanis?"

Anak dia jawab : "Bapaa.... om polisi ambil sa pu layang-layang, dong bilan kalo dong sita itu untuk keamanan........!!"

Bapa langsung pergi ke kantor polisi lalu bilang : "Pak politi, kenapa tahan ta pu anak pu layan-layan."

Pak polisi dia jawab : "Habis, ada tulisan OPM jadi ?"

Langsung bapak ini bilang : "Makana, pak politi ko tekolah, 'OPM' itu artina 'Oktopianus Puna Mainan' ! !

ALMAMATER

Pada suatu hari Obed de penasaran dengan kata "Almarhum", jadi de tanya de pu bapa.

Obed : "Bapa.. kalau Almarhum itu sperti apa "?

Bapa : "Oh...itu sebutan untuk bapa tong ini, ko pu bapade, bapatua dong, trus ko pu tete dong itu...kalau tong mati, itu yang dong sebut Almarhum....."

Obed : "Trus kalo Almarhumah ?

Bapa : " alau Alamarhumah itu sebaliknya, kayak ko pu mama, ko pu tanta, ko pu mamade, atau ko pu nene dong itu.....kalau dong mati, itu yang dong sebut Almarhumah..."

Tapi Obed masih penasaran jadi de tanya

Obed : "Bah.... baru Bapa, trus kalau macam kitong anak-anak ini kalau mati ...dong sebut apa..."?

De bapa diam sedikit, baru de bapa jawab.

Bapa : "Tara tau eee... mungkin 'Al.. mamater" ka ?"