COBA GONGGONG KA?

Pace Yaklep de pulang malam baru su meter kandas.

De toki-toki pintu tapi de pu maitua deng anak-anak dong tra mo buka pintu

Terpaksa Pace Yaklep tidur di depan pintu.

Pagi begini, pas de pu anak mo keluar, anak-anak kaget liat ada orang tidur depan pintu rumah.

Anak tanya : “Bapa itu ko ka?.”

Yaklep ganas: "Ah trada, ini kam pu anjing!.”

Anak ko balas: "Kalo anjing, coba gonggong ka?.”

HASIL LIMA TAMBA LIMA

Ada anak satu dia pu bapak tanya dia.

Bapa : "Anak.. bapak liat ko su sekolah lama sekali. Sekarang ko kelas berapa ka?"

Anak : "Sekarang sa su kelas 6 bapa, memang kenapa?"

Bapa : "Pele... su tinggi juga eee. Bapa maw tanya ko ni.., 5 tambah 5 berapa??"

Anak : "Itu gampang saja, 10 to!!"

Bapa : "Aneee... anak bapa rasa 10 terlalu banyak. Mangkali bisa 7 ka?"

TUNGGU MOBIL LEWAT

Pagi-pagi Yaklep pu anak yang baru umur 9 taon, kebetulan lagi libur skolah minta ijin

Anak : "bapa sa pi ke pius pu rumah dulu eeee....."

Yaklep: "Eh... Anak makan dulu baru pi kesana ee?

Anak : "Uda dari tadi bapa, sa bisa pegi kah traaaa...."

Yaklep : "Ah kamu ini, pigi suda, tapi hati-hati kalau menyeberang tunggu sampai mobil lewat dulu... eee... Baru menyeberang?"

Anak : "Beres sa su tau...."

10 menit kemudian Yaklep pu anak, pulang sambil menangis pica... dengan suara keras...

Yaklep dengan nada suara marah tanya : "Ah.. anak kamu kenap menangis begitu...? Dong ada cubit ko kah? Atau dong ada pukul kah.. ? Oh kurang ajar, dong belum tau Bapa Yaklep kah?....  Cepat jawab kenapa ko menangis, sa kasi pica mereka?"

Anak: "Tidak bapa, sa tra dapa pukul dan dapa cubit...."

Yaklep : "Terus kenapa??!!

Anak : "Tadi bapa bila kalau mau menyeberang tunggu mobil lewat dulu, sa su berdiri lama sampai bosan, mobil tra lewat-lewat, sa cape dan sedih makanya sa menangis..."

Yaklep pusing 7 keliling : "Ini sa pu anak bodo kayak sapa eeee???"

LAHAN BAGUS DICUNGKIL BABI

Ada pace Sorong satu de pu anak perempuan kuliah di Jawa, Begitu selesai di wisuda de pu anak pulang.

Tapi dia pu anak pulang dengan anak kecil, jadi pace tanya.

Pace : "Maria... sapa pu anak yang ko bawah tu,?"

Trus Maria bilang : "Ini sa pu anak"

Pace tra kaget, cuma pace penasaran sebab dia pu cucu lebih hitam dari dia deng dia pu anak, jadi de tanya lagi

Pace : "Baru ko pu laki orang,,?"

Maria jawab : "Orang gunung.."

Pace langsung kaget dan bilang : "Tuhannn...kenapa kasih lahan yang bagus tu Babi de Cungkil ka?"

PENCURI IKAN GORENG BUMBU POTAS

Suatu pagi ada anak satu de ada goreng ikan, trus dia taru di meja.

Setelah itu anak ini pergi main-main, siangnya dia balik kerumah mo ambil ikan yang dia su goreng tu.

Dia cari-cari tapi tra dapat-dapat, padahal tadi dia ingat kalo dia ada taru di meja.

Anak ini liat dia pu bapa yang ada tidur sante di para-para.

Dia tanya dia pu bapa : “Bapa eeeeeee siapa yang makan ikan di meja kaaaaa????”

Bapanya jawab : “Anaaaak... bapa tidak tidak tau siapa yang makan eee…”

Anak : “Bapa baaa...  boooo ..!!! siapa yang makan ikan ituuuuu ..”

Bapanya jawab lagi : “Anaaaak... bapa su bilang tooo bapa tidak tau, nanti bapa cek, siapa yang makan ko pu ikan goreng tu!!”,

Jadi anak ini mulai taru menangis, dia pu bapa tanya dia : “Kenapa ko menangis kaaaa ??”

Anak : “Sa menangis karna ikan tadi Itu saya goreng dengan potas”

Dia pu bapanya kaget : “Ba...? betulkah?……. boooo ..anak!.. ,ikan tadi bapa yang makan.”

Abis itu pace pu poro taputar....