HARGA PARFUM MAHAL DAN MURAH

Satu kali Nene naik taxi (angkot). Tralama Mace 1 de naik deng bobou harum.

Nene: “ko bobou harum sampee”

Mace1: “tenang saja nene, ini BULGARI, de pu harga 2juta”. Mace de pamer, nene ko diam saja tp dlm hati ‘qmai ko sombong sampe’

Tralama Mace 2 naik.

Nene: “Bah Harum ee”.

Mace2: “Ko tau nene ini GUCCI, de pu harga 3,5 juta”. Nene dlm hati ‘epenka’

Sudah, nene ko turun dari taxi sambil konto, de pu bau busuk sampe….mace dorang 2 su mau pingsan ka ini.

Trus nene de angkat:.

Nene: “TERASI, 6 ribu rupiah!!!”

NENE NAIK OJEK DEKAT PAGAR

Nene mau pergi ke pasar jadi dia panggil ojek dari depan rumah.

Satu mas ojek datang begini nene mau naik, karena motor agak tinggi jadi nene pegang d pagar baru naik.

Mas ojek tra main lihat ke belakang, dia langsung bilang : Nene, pegang kuat eh!

Nene jawab baik : iyo anak, nene su pegang kuat ini

sudah mas ojek ko gass begini langsung bunyi, Brrraaaaakkkk!!

Mas ko lihat begini Nene su jungkir dan pagar talapass, Nene su naik motor baru masih pegang kuat d Pagar,,

SALAH PUKU NENE

Ceritanya tentang seorang pria yang memukul nenek di Pasar

NENE DENG AYAM YOSPAN

Siang-siang ni ada nene satu dia lagi jemur beras dihalaman depan rumah.

Begini nene de dengar bunyi lagu nene pu kesukaan dari lapangan kampung, ternyata ada pesta, jadi nene su lupa dengan jemur beras. Nene taruh beras begitu saja.

Nene pergi ke acara, nene goyang-goyang sampe dua lagu selesai, baru nene ingat kalo nene ada mo jemur beras.

Nene : "Yaa sa pu beras yang sa jemur bagemana eee!"

Nene sampe di depan rumah begini liat ayam su acak-acak beras, baru ayam lagi patok-patok.

Jadi nene mo usir ayam, tapi karna masih pengaruh dari pesta, jadi nene usir dengan gaya yospan lompat maju sambil dua tangan ke depan.  .

Nene :  "Seerrrr... serrrr...serrrrrrrrrrrrr"

Ayam kaget, mundur baru bikin gerakan yospan, sambil bilang ":Kurrr.. kurrr.. kurrrrrrrrrrrr"

NENE, OJEK KAH?

Ada sebuah kapal terbakar dan tenggelam di lautan luas Pasifik. semua penumpang lompat ke laut untuk berenang. Termasuk satu nene.

Saat lagi tunggu datangnya pertolongan, satu ekor ikan hiu muncul dari kejauhan, ikan itu kelihatannya mo lewat di depan nene.

Nene ini takut sekali, ikan hiu ini berenang sampe lewat nene.

Jadi nenek su lega,.. Tapi tiba-tiba,, ikan paus itu mundur.

Nene pu rasa takut kembali datang..

Begini sampe depan nene, ikan hiu dia tanya : "Nene,, ojek kah.??"

---

Disampaikan oleh Agustinus Mahuze

KALO NENE JADI EMAS

Ada tete satu ni, dia sedang rayu nene.

Tete: "Sayang, andai ko jadi bulan sa jadi bintangnya, andai ko jadi gunung, sa jadi lembahnya."

Begini nene de tanya tete : "Tete, kalo sa jad emas, ko jadi apanya?"

Tete dia jawab : "Kalo ko jadi emas.........., sa jual saja too,...."

PARFUM PALING HARUM

Di satu gedung bertingkat ada satu nene yang mau naik dari lantai satu ke lantai tiga.

Pas tunggu di depan lift, liftnya terbuka lalu ada wanita cantik dekat nene dengan bau parfumnya yang sangat semerbak.

Nenek bilang : “Sungguh, anak,  parfum wangi sekali... pake apa ka?” sambil perhatikan wanita itu masuk sama-sama ke dalam lift.

Wanita itu jawab : “Vaganza parfume, 500 ribu satu botol”.

Nenek kaget dan heran dengan harga parfum tu. Trus dong dua naik ke lantai 2, ada wanita lain lagi yang masuk ke dalam lift dengan parfum yang lebih wangi.

Nene bilang lagi : “Andeeee. anak, parfum pu wangi apaaaa?!!,“ sambil geleng-geleng kepala keheranan.

Wanita itu jawab: “Ros parfume 1 juta per botol”.

Sampe di lantai 3, nene langsung keluar dari dua wanita itu dengan parfum yang luar biasa wanginya dan lebih alami, sampe buat kedua wanita itu tutup hidung.

Baru nene jawab dengan sante : “Anak dua.. ini parfum terasi, Cuma enam ribu satu kilo."

NENE PINK

Ada nene satu de keluar dari rumah pake baju warna PINK, celana ketat PINK, kacamata PINK, helm PINK, ikat rambut PINK, sarung tangan PINK, sepatu PINK, pokonya semuanya PINK.

Nene trus pake motor Scoopy warna PINK baru jalan. Sampe di lampu merah Waena ada cowo ganteng  satu pake motor Kawasaki baru pulang dari Kampus Uncen de penasaran liat  'cewe' PINK menyala yang miterius itu yang de pu helem tutup mati dia pu wajah.

Nene main gas cari perhatian.

Cowo ni jadi semangat jadi de bilang : "Ade baju pink, kaka bisa kenalan kaah??"

Tapi nene bikin diri genit, baru gas balap kasih tinggal cowo, jadi cowo itu ikut balap, sampe di depan Taman Makam Pahlawan Zipur begini nene de stop.

Cowo de ikut stop.

Nene pas buka helm begini, langsung cowo itu kas menyalah motor baru gas.

Sambil balap kastinggal nene, de bilang : "Yaswarrr... sa kira ikut pucuk kaaa, padahal akar yaaa..!!!"

NENE DAN JENGGOT PENDETA

Nene satu ni pergi ke gereja dan langsug duduk di deretan depan.

Begini karena pendeta yang kotbah ni pu jenggot panjang jadi nene mulai menangis.

Dari awal ibadah sampe akhir ibadah nene menangis.

Begini waktu pulang ibadah, nene ni tunggu di depan pintu.

Jadi pendeta ni langsung tanya nene.

Pendeta : "Nene kenapa menangis dari awal sampe akhir,  nene terharu dengan sa pu kotbah ka?"

Nene jawab sambil cigi menangis: "Bapa pendeta sa tidak menangis karna bapa pu kotbah, tapi karna bapa pu jenggot ni sama dengan sa pu kambing yang kemarin hilang."