Showing posts with label MABUK. Show all posts
Showing posts with label MABUK. Show all posts

CAMPUR MASALAH SENDIRI



Gara2 pace Kapala meter trus,.laki bini bakalai mati,.


MACE:dasar laki2 biadab kurang ajar dalam otak itu minum mabok saja,trima gaji tra ingat anak istri,.maboook sajaa..

meter jadi Pace jawab..

PACE:ahh pelle love,.sa biar begini2 tp sa sayng ko ee,.trada lagi ko sajaa..sayang jang gugup ka uang ada ni,..

mace nada su naik dua oktaf tinggi skali,.meledak2..

MACE:Tuhan tolong e,.laki biadab anjing,..ko mo mati tu yang..20 ribu ini untuk apaaa,..adoo ko pake beli apa ka...bangsat...goblok ni,..

PACE: ahhh mace kam susah skali,..I begitu saja kam marah sampeee...20 ribu ni wang juga...
Mace su emo tinggi,.jd ribut bicara trus,.sampe sedikit lagi mace bunyi..sampe ada yg lewat kasian jd maksud mo bantu amankan ka ini..tp tra bisa pele capee..

MACE: eehhh ko sapa,.ko dari mana datang kemari mo pele pele,.lebe bae ko pigi yo sa bilang ko pigi..ko blum tau saya..Ko pigi jang Ikut Campur Kami pu Masalah Nanti kami campur sendiri..
hehehee trims,.

PACE MABUK TIDUR DI GEREJA




Ada pace satu dia mabuk baru dia tidur di gereja. Pas hari minggu begini waktu pak pendeta datang kasih bangun pace,... pace mabuk itu langsung jawab : apakah salah aku tidur di rumah bapakku...?

TAGIH UANG KE ANAK-ANAK GAUL DAN PACE SATU


cerita tentang dua orang mabuk yang slak mo tagih uang ke anak-anak gaul dengan satu pace tentara...

MINUM MABUK SUPAYA CANTIK


Ada PACE dengan MACE ni baku melawan gara-gara miras, MACE mau supaya PACE dia stop minum lagi.

MACE : pace.. ko harus stop minum2 tra usah pi mabok2an lagi .....BOROS TAU..!!!" .

PACE : beee ko larang2 .., baru ko saja pi salon, beli make-up itu satu minggu habis 3 juta.....itu lebih boros

MACE : sa pi salon, beli make up kan biar kelihatan cantik, cantik ini kan buat ko juga toooo ? ;;):*

PACE : neeeee emangnya ko pikir sa minum2 untuk sapa ka ? sa minum2, itu buat ko juga toooo.

MACE : macam bagemana, barang itu bisa begitu ????

PACE : sa mabok biar ko kelihatan cantik tooo....

POLISI ORANG MABUK


Satu hari ada pace yang mabuk, trus tidur di tengah jalan raya. Pas paginya ada pace polantas satu datang untuk tertibkan lalu lintas.

Pas pace polantas lihat pace mabuk itu, dia ke pace itu baru mo kasi bangun.

Polantas; “ pace ayo bangun jangan tidur di tengah jalan”.

Pace mabuk lalu berdiri, baru dia pergi dan pindah ke gorong-gorong baru dia lanjut tidur di situ.

Polantas yang emosi, tegur pace mabuk itu lagi

Polantas : “pace jangan tidur di sini lagi”.

Pace yang mabuk jadi emosi, juga baru dia bialng pace polantas.

Pace : ”Woii pace.. ko ini Polisi Lalulintas, bukan Polisi Orang Mabuk... jadi urus ko pu lalulintas sana... bukan sa pu kemabukan”

IPAR KO SIRAM


Satu kali ada pace duduk siram dengan de pu anak laki-laki, dari sore sampe malam ka ini. Jadi dong dua su mabok berat.


Karena su kena miras jadi anak ko angkat kata : "Ipar ko siram.....!!!"


Pace su dengar tapi pace pikir orang lain yang de pu anak panggil... Anak ko panggil lagi dan pace ko marah


Pace : Eh anak!!! sa tu ko pu bapa bukan ko pu ipar!!!


Anak : Ah kan ko kawin deng sa pu mama to jadi sa panggil ko ipar...

TRA PAKE TELAN MUSUH


Pace Pendeta David ni ada khotbah di ibadah Pemuda baru hari itu pace bicara tentang hal hal duniawi terutama miras adalah musuh yang harus dihindari oleh para pemuda.

Pas pace David selesai khotbah begini Bobi yang biasa minum miras langsung angkat suara.

Bobi : "Bah.... bapa pendeta baru yang bapa khotbah waktu ibadah Minggu di gereja tentang 'Mengasihi Musuh' itu bagemana?? sa lagi belajar untuk mengasihi 'musuh' baru!!!"

Pace Pendeta David dengan tenang jawab : "Iyooo...  betul memang..., torang harus mengasihi musuh... TAPI TRA PAKE TELAN MUSUH... Tooo!!!"

INSAN RASA JERUK


Nene dia ada kasi 10,000 rupiah ke tete untuk beli ikan kaleng saurice. Supaya jadi lauk untuk papeda. Padahal tete ada pamalas ke pasar.

Begini pas tete pergi ke pasar, tete ketemu dengan teman-teman lama yang lagi kumpul-kumpul uang supaya bisa minum miras. Dong batariak tete : "TETE... bisa tambah-tambah kah?"

Tete de langsung lupa dengan tujuan awal ke pasar, baru de jawab : "Ada nih!!"

Tete kasih 10,000 tu ke dia pu teman-teman baru dong jalan cari Saguer, dapat satu botol baru dong minum.

Baru tete dong minum di tempat karaoke, jadi perem-perem muda ada duduk di samping tete.

Baru nene ni tunggu tete lama sekali, jadi nene akhirnya ke pasar. Sampe di pasar, anak-anak kompleks kasitau nene kalo tete ada miras di tempat karoke, nene pas liat tete duduk dengan perem-perem muda, nene hati hancur.

Jadi nene jalan pulang, sampe di rumah, nene dia nonton tv, tapi karena yang muncul di tv cuma iklan obat rasa buah buahan jadi nene kasi mati tv, baru nene tamba ganas tete.

Sambil menangis nene masuk dalam kamar trus ambil pakaian,

Su habis minum, tete pulang. sampe di rumah tete berteriak : "Nene.... neneee..."

Nene dia tra jawab. Baru nene de kunci pintu kamar, supaya tete tra masuk.

Tete pas mo buka pintu kamar begini kaget kalo pintu takunci, jadi tete bilang : "Nene... ko buka pintu dulu..!!!"

Nene sambil menangis jawab : "Hikkk... hikkk ... PERGI... PERGI... JANGAN KAU SAKITI INSAN YANG RASA JERUK INI..."

KODOK MABUK


Ada dua orang pace lagi mabuk di Terminal Mesran, dong dua beli wiro dua botol.

Dong dua minum satu botol su habis, baru su kena mabuk.

Dong dua mo paksa minum satu botol lagi tapi su tra bisa.

Jadi pace dua ni tidur sambil bicara-bicara sembarangan.

Lagi asik-asik bicara, begini ada kodok satu lompat, kodok lompat sambil baribut.

Salah satu pace mabuk ni dia liat kodok.

Jadi dia pegang kodok baru dia ambil satu botol yang dong tra minum, dia kasi minuman itu sungsang ke kodok pu mulut.

Pas minuman satu botol itu habis untuk kodok, pace dia lepas kodok.

Begini kodok dia diam saja, su tra bisa jalan lagi. Jadi pace dia su pikir kalo kodok su mati.

Akhirnya pace dia mo korek kodok itu.

Pas pace pu tangan su dekat kodok, begini kodok buka mata yang su merah itu baru bilang : "LEPAS SAYA.... LEPAS SAYA.....JANG ADA YANG PEGANG SAAA!!!"

KETUA KLASIS ADA DI KAMAR SEBELAH


Begini ada pace satu yang tiap hari miras deng main perem baru jarang sembayang di gereja de meninggal.

Di akhirat begini, pace dapa suru masuk neraka karna de pu dosa yang tatumpuk.

Masuk ke pintu gerbang neraka begini de liat banyak orang ada dapa siksa baru yang lain ada tunggu giliran sambil duduk-duduk.

Begini pace kaget karna pace ketemu dengan de pu gembala gereja.

Pace : "Bahhhh... pa pendeta di sini juga ka???"

Pendeta de cepat-cepat suru de diam baru bilang : "Stttt... ko jang bicara keras..., Ketua Klasis juga ada dikamar sebelah."

PACE MABUK MO MAKAN DI WARUNG


Pace satu dia mabok setengah berat, trus dia jalan menuju ke warung.

Sampai di depan warung dia tanya sama mbak penjaga warung.

Pace : "Mbak ada ayam ..ka ?"

Mbak : "Ada mas..."

Pace :"Ada sapi..ka?"

Mbak : "Ada mas...mari mas...!"

Pace : "Kalau kambing...?"

Mbak : "Ada mas ..mari ..silakan masuk...mas....!!"

Pace : "Eehh....bebek ada..ka ?"

Mbak : "Iya...mas ada...monggo mas.."

Langsung pace bilang sama mbak

Pace : "Kalo begitu suruh dong smua kluar, sa mo masuk makan"

Mbak cuma diam kebingungan.

SA IKUT MAMA JUGA


Pace deng Mace ini dong bakalae rame, Habis pace de tra pulang dari malam sampai pagi, baru masih ada mabok sedikit lagi.

Mace : "Pokoknya sa minta cerai....cerai....!!!"

Pace : "Okai...ciips tong cerai...anak-anak pasti ikut saya...!!!"

Mace : "Sapa takut....Epen..ka"

Dong bawa dong pu anak tiga pi urusan di Pengadilan Perdata bagian urus perceraian. Hakim pengadilan de tanya dong dua.

Hakim : "Jadi ini masalah bagaimana ?"

Mace : "Pak Hakim, pokoknya saya minta cerai....titik...!!!"

Hakim : "Oke....masalah akan kami proses, trus Bapa mau bagaimana"

Pace : "Oke...pak saya juga cerai..?"

Hakim : "Maaf...Ibu deng Bapa...apa masalah ini tidak bisa di selesaikan secara keluarga..ka ?

Pace: "Adoh...pak Hakim langsung saja urus" (pace yakin nanti anak ikut dia )

Hakim : "Oke.. baaik...trus anak-anak ini bagaimana ? "

Pace : " pak Hakim ko tanya saja, dong mau ikut siapa....mama ka bapa. ?"

Pak Hakim tanya ke anak yang tua

Hakim : "Ade Minggas, pilih Mama ka Bapa....?

Minggas : "...saya...ikut...mama saja.. "

Pace dalam hati bilang : "Wah.. pasti Maria deng Stephen pilih ikut sa, sebab dong dua pu uang jajan sa kasi trus..."

Hakim : "ade Maria, ko pilih Mama ka Bapa..?"

Maria : " saya ikut mama saja "

Pace dalam hati yakin kalo si kecil Stephen pilih dia.

Hakim : "Ade stephen, ade ko mau ikut Mama ka Bapa..?"

Stephen nih su mo jalan ke dia pu bapa, Tapi karena dia lihat dia pun kaka dua di samping mama kode dia kesana jadi de langsung belok ke sana, lantas bilang : "Taya yuga ikut mama taja"

Pas pace dia pu mabok su mo hilang-hilang, pace de rasa kecewa dan sedih sendiri karena liat dia pu anak ikut de pu mama, pace langsung tunduk.

Hakim : "Ya...bapa Obed, anak-anak smua su tentukan pilihan...jadi bapa pilih bagaimana...?"

Pace de angkat muka pelan trus dia lihat dia pu anak-anak trus pace lihat dia pu maitua, langsung pace jawab.

Pace : "SA.... IKUT.... MAMA ......JUGA ...!!"

Sambil pace dia hambur menangis, baru polo mace.

LAMPU JALAN


Pace Enos deng Pace Yakob dong dua mabuk berat sampe su tratau ini siang ka malam. Jadi dorang duduk baku melawan yang diatas itu bulan ka matahari.

Ada duduk baku melawan begini pace Yaklep yang juga meter su kandas lewat.

Pace Enos de batariak : “Woi Yaklep, ko tau yang diatas itu bulan ka matahari?”

Yaklep ko liat ke atas lama sampe, baru de jawab : "Adoh kam dua, sa ni baru dua minggu di sini, sa tratau itu apa, mungkin itu lampu jalan ka"

COBA GONGGONG KA?


Pace Yaklep de pulang malam baru su meter kandas.

De toki-toki pintu tapi de pu maitua deng anak-anak dong tra mo buka pintu

Terpaksa Pace Yaklep tidur di depan pintu.

Pagi begini, pas de pu anak mo keluar, anak-anak kaget liat ada orang tidur depan pintu rumah.

Anak tanya : “Bapa itu ko ka?.”

Yaklep ganas: "Ah trada, ini kam pu anjing!.”

Anak ko balas: "Kalo anjing, coba gonggong ka?.”

BABI MAKAN WARUNG


Ada pace satu nih piara babi banyak sekali.

Satu hari bgini pace ko pi mabuk-mabuk sampe pagi baru pulang ke rumah.

Pulang dari acara mabuk pace ko langsung kipas tidur.

Karna pace ko blum kas makan babi-babi jadi babi-babi nih tinggal batariak-batariak dari kandang. Mace dengar jadi mace kasih bangun pace yang ada mo tidur itu.

Mace : "Woi, pace ko bangun tempo, babi-babi di kandang su lapar tuh!!"

Pace: "Ah, sa malas, ko tra liat sa ada enak-enak tidur k??"

Akhirnya mace ko pergi ke kandang.

Tapi karna babi nih tinggal ribut trus, jadi mace tinggal bolak-balik kas bangun pace dia.

Mace : "Bah, ko bangun tempo sudah, babi su trlalu ribut skali tuh!!!!"

Sambil tarik uang 50 ribu dari saku, pace bilang : "Ini, ada 50 ribu, ko pi bawa babi-babi dong makan di warung sana sudah!!!"

MASUK BOTOL JENEVER


Ni ada pace dua ni minum mabuk terlalu banyak sampe satunya meninggal.

Begini dia punya teman  cari peti mayat untuk dia, kebetulan dia pu uang cuma 700 ribu saja.

Jadi dia cari peti yg harga tujuh ratus ribu.

Pace cari kemana-mana, ternyata tra ada peti yang murah sampe begitu.

Dia  masuk di salah satu toko penjual peti mayat, yang jaga mbak.

Pace : "Begini, mba... ada kahh, peti harganya tujuh ratus?"

Mbak : "Yang harga tujuh ratus itu untuk anak kecil saja"

Pace dia langsung tanya sama mbak lagi : "Kalo untuk orang bésar tapi harga tujuh ratus... ada ka tidak???"

Mba jawab : "Ada si..! Tapi orangnya di kasi masuk didalam botol jenever."

JANGAN MEMBANGUNKAN AKU


Ada pace satu de mabuk dengan de pu teman-teman.

Dong dari hari sabtu malam sampe pagi, de mo pulang ke rumah tapi su tra kuat jalan jadi, pace de sleep di samping gereja.

Pas pagi bgini de pu maitua dong mo ke gereja dpat lihat pace de tidur di samping gereja.

Karna orang-orang yang mo ibadah lihat pace tidur dong mau kasi bangun tapi dong takut pace dia,... .,

Mace tra enak dengan orang-orang jadi mace ko kesana kasi bangun pace dia

Mace : "Pace ko bangun sudah,.. ko pi tidur rumah sana,..ini tempat ibadah ko jangan tidur sini."

Karna pace rasa terganggu jadi pace balik angka muka ke maitua dia baru pace d bilang

Pace : "Jangan membangunkan aku di Rumah Bapak-Ku"

Mace d diam dan langsung masuk kedalam gereja,

Tapi dalam hati mace bilang : "pace ko tunggu di rumah,.,!!!
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.