KENA PAKU DENGAN PAKU-PAKU

Pace satu de Meningal karena de pu kaki kena Paku trus infeksi makanya de is dead....!!

Pas mo pemakaman, kasihan de pu Istri menangis sedih skali baru bilang...

Sayang...Aduh..Sa Sayang ko skali ehhh...

Masa karena kena Paku saja ko Meningal....

Sa saja yang tiap hari ko Paku trapapa baru...trus ko su trada begini nanti klo malam siapa yang Mo Paku-Paku saya lagi..!!

MACE PU CARA HILANGKAN JENGKEL

Pace Jon dengan Mace Sara ni ada duduk-duduk sante di teras rumah, baru Pace ni langsung mo rayu-rayu mace..

Pace : "Ma, ngomong-ngomong ni kita su menikah berapa tahun eee??"

Mace : "Su 30 tahun, bapa.. Memang kenapa?"

Pace : "Begini ma, sa ini macam rasa kagum deng bangga sama mama, nii..!"

Mace : "Kagum kenapa?"

Pace : "Selama ini sa suka marah-marah mama, tapi mama tra pernah satu kalipun marah sama bapa..!"

Mace deng nada sante jawab : "Oh… itu..!"

Pace : "Boleh tahu ka mama, memang dia pu rahasia apa?"

Mace : "Boleh kok, bapa…!"

Pace : "Apa itu ma rahasianya? Biar bapa juga bisa kaya mama!"

Mace : "Begini bapa, setiap sa rasa jengkel sama bapa pu kelakuan, sa langsung masuk ke kamar mandi."

Pace : "Buat apa? Menangis ka?"

Mace : "Bukan...!"

Pace : "Trus buat ada di situ, mama?"

Mace : "Sa langsung sikat kloset wc..."

Pace : "Yee.. de pu hubungan, memang bisa hilangkan mama pu rasa jengkel?"

Mace : "Bisa to... soalnya sa sikat kloset wc-nya pake bapa pu sikat.."

Pace : "Wuuekk …."

Pace langsung de muntah satu ember..

PROMOSI VACUM CLEANER

Pace Alo dia kerja jadi Salesman Vacum Cleaner, mesin Pembersih Debu ka ini, baru dia pigi di tanta Mince pu rumah, dalam rangka mo demo dia pu produk.

Pas sampe, Pace Alo dia toki pintu. Tanta Mince dia belum bicara, begini Pace Alo langsung hambur segala macam kotoran diatas tanta mince pu karpet.

Deng percaya diri, Alo dia promosi : "Tanta jang takut.. sa yakin deng mesin ini pu kemampuan, Pasti semua kotoran tu bersih, sa jamin itu. Kalo tra bersih, nanti sa makan semua kotoran tu".

Deng santai campur ganas tante dia jawab : "Yooo... kalo begitu, dari sekarang saja ko makan pelan-pelan kotoran yang ko hambur tu,, masalahnya... strom di rumah ni su dikasih putus dari dua bulan kemarin"

DIBAYAR LUNAS

Ada pendeta satu, dia alami kecelakaan kecil pas naik motor dengan istri sampe mereka berdua jatuh bersama motor. Waktu pendeta angkat motor, dia pu istri marah-marah.

Istri : "Bah... bapa kenapa angkat motor duluan, seharusnya saya dulu, baru motor!"

Pendeta dia jawab dengan tenang : "Mama itu sudah DIBAYAR LUNAS oleh DARAH YESUS. Tapi kalo motor ini ka MASIH KREDIT, BELUM LUNAS.!!! "

TETE TRA TAU MASALAH

Ada Pace deng Mace, dong dua ada ada duduk-duduk dan baku marah di Taman Imbi.

Pace : "Ko kenapa marah sa?, sa tidak tidak selingkuh dengan dia!!!"

Mace : "Ahhhh... laki-laki semua begitu, kam tu kalo su ketahuan, langsung cari alasan!!"

Pace : "Jiiii... sa tra cari alasan, sa bicara kenyataan...  kalo ko tra percaya ko tanya tete di sebelah ko"

Tete yang ada duduk di samping mace ni ternyata dari tadi su kuping dong dua pu pembicaraan, karna Tete ko kaget, jadi tete de jawab.

Tete : "Jiii... sa tra tau kam masalah,.. Perem itu juga yang paksa-paksa ade laki-laki ko selingkuh... to????"