BAPA ADE DI PENERBANGAN

Ni ada tikus kecil satu dengan de pu mama di bawah pohon gersen dekat kali.

Tiba-tiba ada kelelawar kecil terbang kikis dong dua baru tikus pu anak tanya sama de pu mama.

Anak : "Mama itu siapa ka ?"

Trus de pu mama bilang : "Itu bapa ade yang kerja di bagian penerbangan..."

Trus tikus kecil bilang : "Kalau begitu, nanti pas sa besar, sa juga bisa sekolah di bagian penerbangan eee"

KASBI MASIH PANAS

Pace satu de piara babi, baru tiap hari babi de makan nasi.

Sekarag beras ada mahal jadi terpaksa pace suruh de pu anak laki-laki masak kasbi utk Babi.

Pas kasih makan begini, babi tramau, anak paksa-paksa juga tapi babi tetap tidak mo makan kasbi.

Jadi anak lapor de pu pace, pace tra percaya, jadi pace pi lihat,  betul babi tra mo makan.

Pace emo jadi pace bilang dengan suara keras sama de pu anak.

Pace : "Anakkk... ko tolong lihat bapa pu parang panjang di dapur dulu!"

Langsug babi de jawab : "Yo..plan-plan to..kasbi masih panas ni! nanti kalo su dingin baru sa makan!"

Pace balas : "Sa juga cuma tes ko mo! ko mledak sampe!"

SUNAT DULU BARU TANYA

Seekor babi hutan dari Timika takut dikejar sama babi Indonesia, jadi de lari ketakutan menyeberangi perbatasan Indonesia-Papua Nugini.

Sampe di PNG. Babi de stop karna ada babi hutan PNG yang batariak dia.

"Ehhh mili... ko kenapa lari dari Papua?" tanya babi PNG.

"Adoohhh... sa takut sama aparat dari Indonesia. Dong semua suka sunat laki-laki," babi de bilang.

"Tapi ko kan bukan manusia. Ko cuma babi hutan?"

Babi Timika ni de balas : "Masalahnya itu. Dong sunat dulu baru tanya".

TIGA TIKUS PU KEHEBATAN

Ada tiga ekor tikus dong tiga baku tantang dong pu kehebatan,

Tikus A bilang de tra pernah takut perangkap tikus dan tiap hari de pake perangkap tikus itu tuk senam ato tidur siang.

Tikus B tra mau kalah, de bilang de tra takut racun tikus. kalau satu hari tra minum racun tikus, de pu badan macam lemas kaa...!

Tikus C tra bicara apa-apa dan langsung berdiri jalan..

Tikus A dan B heran, trus tanya Tikus C  : "Ko mau ke mana?"

De jawab sante saja : "Ah trada sa ada kencan dengan kucing di rumah sebelah, sa su kangen dia jadi"

HARIMAU BERDOA MAKAN

Di tengah hutan, ada pemburu satu yang su habis peluru, baru pace ni ada baku hadap dengan harimau.  Pace takut sekali.

Walo pace ni Kristen, tapi dia jarang berdoa, tapi gara-gara harimau, pace terpaksa harus berdoa.

Trus, dia lipat tangan baru tutup mata, sambil berdoa minta lindungan Tuhan.

Begini pas pace selesai berdoa, dia buka mata.

Pace de kaget karna harimau su ada di pace pu depa.

Baru harimau itu ada lipat tangan baru berdoa : “Tuhan, terima kasih sekali.... hari ini sa ada dapat makanan.”