Showing posts with label WAMENA. Show all posts
Showing posts with label WAMENA. Show all posts

SEGE IKUT KARAPAN BABI


Ada pace satu nama Pit Mabel, de ni punya babi nama Sege yang ikut lomba karapan babi waktu Festival Lembah Baliem. Hadiahnya itu puluhan juta rupiah.

Pace Pit de su yakin kalo Sege akan menang karna selama ini de su ajar trik-trik terbaru ke Sege untuk menangkan karapan babi.

Begini su babak final, sisa 5 ekor babi yang akan berlomba, termasuk Sege. Baru penontong dong semua berteriak : "SEGE, SEGE,SEGE,SEGE!!!!"

Pas bendera start dikibarkan, Pit dengan Sege balap... dong kasi tinggal empat babi lainnya.

Begini pas 20 meter dekat finish, Sege de stop, pace Pit paksa dia jalan deng cambuk tapi de tra lari, ternyata Sege de kencing, baru de santeee nikmati suasana itu.

Pace Pit de sepak Sege, tapi babi tu tetap tenang, sampe akhirnya babi lain yang tatinggal 40 meter tadi lewati Sege, sampe akhrinya babi itu yang sampe di garis finish.

Pit de menangis guling-guling di rumput, gara-gara kalah.

Begini Sege yang su selesai kencing, de jalan dekat Pace Pit baru de kasi suara : "Ngookkk ngoookkk???"

SURAT CINTA UNTUK MINGAS


Demianus de ada tulis surat cinta buat cewe satu, begini bunyi suratnya:

Kpd YTH MINGAS tayang 
  di villa penantian

Aku kenal kamu diacara bakar batu, hatiku gelisah macam babi kena yerat, sa cuap ko, ko yuga cuap sa, macam lagu cuap-cuap.

Tapi ko puna bapa tu yahat tekali, macam Tuan Takur, bikin sa pu love cama ko bagaikan menderita dibawah pemerintahan Pontius Pilatus.

Yika kita beryumpa, sa mau kita bersinta seperti babi mandi dikolam pecek Pasar Wosi.

Demikian surat ini, akhir kata 'NO SMOKING' yang artinya KAKA CINTA KO TEKALI.


t.t.d. Kaka Kanten Demix

MAKANAN MINGGU LALU


Nie ada Pace Wamena satu, de naik pesawat baru de duduk di samping Mas Jawa.

Mas de makan roti pake mentega, baru de tawarkan ke Pace ini.

Tapi pace ni de tolak deng sopan, baru de bilang : "Ah.. tadi pagi sa yuga sudah makan Roti dgn Keju, mas"

Tra lama bgni pesawat de oleng, bru pace ni de muntah-muntah

Pace satu ini dia muntah muntah Hipere lapis dengan dia pu daun Hipere.

Bru mas de bilang : "Loh, katanya makan Roti pake Keju?"

Pace balas : "Ah.. ini sa pu muntahan makanan minggu lalu, mas"

IBUKOTA PROVINSI PAPUA KE WAMENA


Ada anak Paniai satu, de pulang sekolah langsung lari cepat-cepat ke de pu kamar.

Trus de berdoa : “Tuhan, tolong pindahkan Ibukota Provinsi Papua dari Jayapura ke Wamena. Terimakasih Tuhan. Amin”.

De pu mama dengar de pu anak doa.

Mama ni tanya de pu anak : “Kenapa ko berdoa begitu?”

Anak ini jawab : “Ado mama, tadi tong ujian semester geografi, baru sa jawab Ibukota Provinsi Papua tu di Wamena”.

Mama, “Dasar ko ini…”

MAKAN TENDANGAN DAN PIKIRAN


Ada anak Wamena satu de pulang dari hutan bawa de pu hasil buruan, satu ekor babi hutan, de jalan pulang sambil siul-siul, Sampe di rumah de teriak de pu mama,

Anak : “Mama lihat... sa pulang bawa babi, nanti  tolong masak yang enak eee, sekarang sa mo mandi trus pergi main dulu.”

Mama jawab : "Iyooo"

Anak itu lanjut : "Nanti sore baru sa pulang baru makan."

Sore begini, anak itu pulang sambil siul-siul lagi, de batariak : "Mamaaa... sa mo makan."

De mama balas : "Makanan su ada di meja."

Begitu de buka tutupan makanan, dia teriak : “Aduh, kam kalau mo makan jangan kaya begini kaaa, masa kam kasih tinggal sa TENDANGAN deng PIKIRAN tu???.” ( maksudnya : KAKI dan KEPALA DAGING BABI)
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.