Showing posts with label SURAT. Show all posts
Showing posts with label SURAT. Show all posts

SURAT UNTUK DIK MERIAM BELINA


Waktu pace Yakob de dengar Artis Indonesia Meriam Belina menyanyi di siaran musik senja di Radio  pace pu Batin tersiksa ka ini..jadi de tanya sama Obet dia…

Yakob : Seeeechh Obet ko tau ini perempuan siapa yang menyanyi di Radio ni…

Obet : aeh..macam ko tra tau saja itu artis yang de pu nama Itu Meriam Belina

Pace Yakob diam- diam pulang ke rumah…tiba di rumah Yakob tra pikir panjang lagi de ambel kertas HVS dan bolpen langsung de tulis Surat …

kepada

yang tersayang Dik Meriam Belina
di Jakarta

Salam Pramuka…!!

Meriam Belina yang cantik dan manis seperti susu Belanda campur dengan alvokat Serui saat saya dengar suara mu mengalun merdu di pita kaset…sa pu hati ini seperti ko penjarakan di bawa pemerintahan Pontius Pilatus…ko bikin sa makan tra kenyang tidur tra nyenyak kencing pun putus..putus…adohh­ ade kaka sayang tapi gunung dan laut su pele jadi nanti kaka berenang saja…

Yakob de tanda tangan langsung taruh cap kepala kampung di bawah lagi karena Yakob de kira Meriam Belina itu kepala distrik…ka apa… Hahahahah

TETE PU PANTUN TUJUH BULAN


Tete dan nene dong dua baku marah, tete pukul nene jadi nene pulang ke nene pu keluarga trus tinggal sampe… hampir 7 bulan.

Tete ko krim surat yang isinya pantun sama nene: “perahu layar bertiang 7. kalo nene setuju kita bertemu di bulan ke-7."

Tra lama nene balas surat, baru nene bikin deng pantun juga

Nene tulis : “Kucing kurus mandi di papan. tete ko kurus, kepala botak, mata manyala! ko suru sa pulang untuk apa…? su pukul sa baru …!!”

SURAT CINTA UNTUK MINGAS


Demianus de ada tulis surat cinta buat cewe satu, begini bunyi suratnya:

Kpd YTH MINGAS tayang 
  di villa penantian

Aku kenal kamu diacara bakar batu, hatiku gelisah macam babi kena yerat, sa cuap ko, ko yuga cuap sa, macam lagu cuap-cuap.

Tapi ko puna bapa tu yahat tekali, macam Tuan Takur, bikin sa pu love cama ko bagaikan menderita dibawah pemerintahan Pontius Pilatus.

Yika kita beryumpa, sa mau kita bersinta seperti babi mandi dikolam pecek Pasar Wosi.

Demikian surat ini, akhir kata 'NO SMOKING' yang artinya KAKA CINTA KO TEKALI.


t.t.d. Kaka Kanten Demix
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.