TETE DENGAN NENE


Ini ada tete deng nene dong dua tinggal di gunung sama dong pu cucu satu. Jadi tiap hari dong makan hasil kebun trusss... sampe satu kali begini nene dia bilang sama tete...
Nene : Tete su lama skalieee... tong tinggal ini cuma makan hasil kebun saja... coba skali-skali tong makan ikan kah... ko pi beli ikan di pasar kah buat tong makan...
Tete: Boooo sayang kalo ko mau begitu nanti sa ke pasar sudah baru sa beli ikan buat ko cinta...
Besok begini pagi-pagi skalieee... tete de su jalan ke pasar untuk cari ikan. Tapi sampe siang juga nene tunggu tete, tete tra pulang-pulang juga. Jadi nene ko bilang sama de pu cucu begini : ”Cucu coba ko pi cek tete di pasar dulu... kenapa de pi lama skalieee baru tra pulang-pulang...”. Sudah cucu ko balap ke pasar, begini pas cucu jalan de liat tete ada duduk cerita deng nene satu (tete pu pacar lama ka ini). Ale cucu ko bikin lari seratus sampe rumah, trus de cerita buat nene. Nene langsung marah, trus bilang sama de pu cucu supaya kunci pintu semua tutup jendala jang kasih tete masuk kas tinggal tete di luar saja. Ohhhh nene emo betul-betul ka ini kam kira kah... Begini tete ko pulang, baru de toki pintu begini...
Tete: Nene... nene...? sa su pulang ini bawa ikan yang kemarin ko minta itu
Nene : ... (nene ko diam saja)
Tete : Nene... nene... sayang ini ko pu ikan yang kemarin ko minta itu...
Karna mungkin tete dia tekan sayang jadi nene pu hati hancur jadi nene ko jawab dari dalam keluar sama tete de begini: ”Pergi... pergi... jangan kau akiti inan yang lemah ini... oohhh...”
Penyangkalan / Disclaimer : Dengan mengunjungi, membaca dan berkomentar di website ini (www.mob.papua.us), Anda telah setuju untuk menganggap semua kisah yang ditulis di website ini merupakan rekayasa tanpa sengaja yang bertujuan hanya untuk hiburan semata.